Poesia nahas-mahas
adin guzientzat...

Marijane Minaberri negua honetan joan zaigu. Haur literatura saileko aitzindaria izan da eta haren poema arin eta alaiak biziki egokiak dira haurrek euskararen edertasuna goza dezaten. Hiru hautatu ditugu:

Mantalin xuritan

Mantalin arin xuritan,
Lanoz bezti da kanpoa.
Ixiltasuna denetan,
Bakea da hedatua.
Oihanetako arbolak,
Baratzetako loreak,
Lanoan dira galduak.

Mantalin arin xuritan,
Bazterrak dagozte lotan.
Nork erran dezake neri
Zoin arbol-adarretarik,
Xorino bat kantuz ari?

Marijane Minaberri
Porroxkak

Altxalilia

Xuri, gorri, urdin,
Nahasteka berdin,
Luma bezain arin,
Lore bat iduri,
Agurka deneri,
Orotan pollita,
Da altxalilia.

Zeru urdinean
Dabila airean,
Pausatuz artetan,
Loreen bihotzetan,
Goxoki xurgatzen
Pilpiran daukaten
Ihitz nigarraren.

Marijane Minaberri
Xoria kantari

Besta on, ama

Bihotzean kantuak,
Ezpainetan musuak,
Begietan izarrak,
Eskuetan loreak,
Maitasuna gaindika,
Xede onak trumilka,
Zure haurra hemen da
Amultsuki diola:
Bihotzetik besta on!
Ama maite-maiteena.

Marijane Minaberri
Xoria kantari

Marijane Minaberriren obra batzuk Armiarma webgunean atzeman daitezke.
Aita-amen besten ospatzeko, horra olerki gehiago, Luixa Giltzuk idatzirik.

Berritsuak

Tantak isildu gabe
zurrumurruka
eta hodeiak haserre
burrunburrunka.

Juan Kruz Igerabide
Ur: Erori nahi ez zuen tanta

Zuri esker

Hazia erainez geroz
Lurrak emaiten lore
Iguzkiak gaua urratuz
Kanpoan hedatzen kolore
Zeruak ere zer itxura luke
Gauaz izarrik gabe

Olerki hauk zuri esker
Ezpain hegira zaizkit etorri
Zuk erain haziak baitu
Nik baitan fruitu ekarri
Zuretzat dutan maitasuna
Neretzat da biziaren iturri.

Henriette Aire
Egiaren egarriz

Ikus 2017ko urtarrileko Olerkia eta aho korapiloak - Urtarriletik abendura
IKASOLAS