Aurten, beste urteetan bezala, Piarres Larzabal kolegioak JUUL kanpainan parte hartu du. Horretan abiatu dira 6. eta 5.eko ikasleak 2016ko Omiasainduko oporretarik landa. Hautatu duten liburu bat sustatu dute, haren ezagutarazteko afixa sortuz.

JUUL kanpaina Nafarroako Ikastolen Elkarteak antolatzen du. Irakurzaletasuna sustatzea helburu dituzten jarduerak ikasturtean zehar eramaten dira, gelan, etxean, ikastetxean, herrian eta Euskal herrian. “Hauteskunde” literarioekin bukatzen da. Urte guziez egiten da hegoaldeko eta iparraldeko ikastetxe anitzetan. 2017an, 19. aldikotz gertatu da eta 3 urte eta 16 urte arteko 17 000 ikaslek ekitaldi horretan parte hartu dute.
Ikasleek gustukoenik duten liburua hautatzen dute. Haiek dira epaimahaikide eta ez irakasleak. Ikasleek gustukoenik dituzten liburuen ilustratzailea ere hautatzen dute. Liburuak euskaraz izan behar dira eta azken 5 urte hauetan argitaratuak.
Aurten, Piarres Larzabal kolegioan, hiru liburu bederen irakurri behar izan dituzte, haietarik baten hautatzeko. Euskara irakasleen laguntzaz, “oroit fitxak” osatu dituzte. Gero, arte irakasleekin lan egin dute afixa baten sortzeko. Oso lan politak burutu dituzte 6.eko eta 5.eko ikasleek eta arras gogotik ari izan dira.

Argitxu Piarres Larzabal kolegioko dokumentalistaren ustez, JUUL kanpainak ikasleak irakurtzera bultzatzeko balio du, irakurzale ez direnak ere. Hauei, liburuen munduan sartzeko molde bat irekitzen die, idazle eta ilustratzaile batzuen izena barneratuz. Eta liburutegi edo liburu denda batean sartuko direlarik ez dira hain arrotz sentituko. Kanpainak alde jostagarria ere badu. Horrez gain, euskal gazte literatura gehiago agerian emateko molde bat da, ikastetxean eta irakaskuntzaz kanpo ere. Azken urte hauetan, idazle eta ilustratzaile gazte anitz agertu dira eta kalitatezko liburuak plazaratzen dira.
Kanpaina “hauteskundeekin” bururatzen da, 2017ko apirilaren 3an eta 4an. Hona hemen Piarres Larzabal kolegioko emaitzak:
6. mailan :
 "Greg 6, etxean itxita" - Alberdania - Jeff Kiney
 "Greg 7, bikotean hiru" - Alberdania - Jeff Kiney
 "Argixorgin" - Elkar - Estibalitz Vivanco
Ilustratzailea: Jeff Kiney / Bie / Alex Orbe

5. mailan :
 "Uda bat Senegalen" - Elkar - Lur Gallastegi
 "Lehen hegaldia" - Elkar - Txiliku
 "Amets ameslari" - Gaumin - Fernando Morillo
Ilustratzailea: Juan Luis Landa / Stefano Turconi / Alex Orbe

Xehetasun guztiak eta ideia anitz JUUL kanpainaren webgunean atzematen dira: www.nafarroakoikastolak.net/juul.asp

Ikus 2017ko apirileko Gelako leihotik: Juan Kruz Igerabiderekin poesian murgilduz

IKASOLAS