Erakusleihoa: Bainera bete itsaso

Mara itotzear dago aita-amek ematen dioten manuengatik: beti badu lan zerbait egiteko, beti presaka ibili beharra da...
Kasu horietan, Marak ihes egiten du. Bainugelaren atea hesten du eta oihuen ordez burbuilen musika entzuten den mundu batean murgiltzen da. Urpean hats har dezake azkenean. Hartan ordena fantasia bilakatzen da, marra zuzenak uhintzen dira, denbora luzatzen da. Bere burua berriz atzemateko denbora badu. Arraina da; ainara da. Libroki hegal egiten du; libroki igeri egiten du.
Atsedenaldi labur bat baizik ez da baina berdin du, bere mundua ber-moldatu duelako. Haren aitak putzu arrunt bat ikusten duen lekuan, Marak itsasoa dakusa.
Testu poetiko eta arina eskaintzen digu Miren Amuriza Plaza bertsolariak. Haur baten ikuspuntutik idatzia da. Jende helduen erritmo estresagarria pairatzen du baina buru egiteko bidea atzeman du eta irakurlearekin partekatzen. Erranaldiak laburrak dira, bertsotan idatziak, eta erritmoz josiak. Albuma errazki irakurtzen da adin desberdinetako haurrekin. Bertsolaritzak haur literaturari zer ekartzen ahal dion ongi erakusten du. Irati Eguren Arrutiren bi koloreko margoek bertsoak ederki osatzen dituzte. Alde batetik Marari inposatzen dioten bizi zuzenegiaren eta bestetik asmatzen duen mundu aberats eta itzulikatsuaren arteko kontrastea agerian ematen dute. Kolorea, ametsetan omen den bezala, bigarren mailan da. Fantasia guztia mugimenduetan eta itxuretan atzematen da.
Jendea, haur, gazte ala zahar, maiz eginbeharrez itotzen da. Bainera bete itsaso bezalako album baten ukaitea onuragarri da, hartan pulunpatzeko eta hatsa berriz hartzeko parada eskaintzen baitu.

Bainera bete itsaso / Amuriza Plaza, Miren, Egilea; Eguren Arruti, Irati, Irudigilea. - Elkarlanean, 2016

Ikus 2017ko apirileko erakusleihoa: Bi kobazulo