Gelako leihotik - Txokolatearen estakuruz

Iaz, urtean zehar, Mirentxu Zubiri irakasle uztariztarrak eta haren CM2 mailako 22 ikasleek txokolatearen zapore goxoa gozatu dute. Uztaritzeko herriko etxeak eta IKASek bultzatu proiektu batean parte hartu dute, ikastetxe bereko CE mailako irakasle eta ikasleekin, bai eta Uztaritzeko beste hiru ikastetxeetakorekin: ikastola, Arruntzako eskola publikoa eta San Frantses-Xabier kolegioa. Mirentxu Zubiriren laguntzaz, ikasleek errezeta tutorialak egin dituzte, Kanaldudek filmaturik [1].
Hasteko, errezeten testuak landu dituzte ariketen bidez, irakurmenaren eta ulermenaren hobetzeko. Lehenik beren artean erabaki zuten zer material eta osagai? zuen bakoitzak etxetik ekarriko. Gero txokolatezko jakia eskolan prestatu dute. Honek elkarrizketa anitz sorrarazi ditu haien artean, eta euskaraz aritzera goxoki bultzatu ditu.

Ikasle batek errezeta euskaraz irakurtzen zuenez gero, solasaldiak naturalki euskaraz segitzen zituzten, frantsesera gutiago lerratuz. Ohartu gabe, hiztegi anitz barneratu dute.
Bitartean, Arruntzako ikasleek ere errezetak lantzen zituzten; ondotik eskolen artean partekatu dituzte. Horrela, ikusi dute Uztaritzeko beste haur batzuk euskaraz ikasten ari direla...
Maiatzean, tutorialen filmatzeko mementoa heldu zen. Anitzek ez zuten Kanaldude ezagutzen eta geroztik harro dira beren lanaren ondorioa denek ikusten ahalko baitute. Liluraturik egon dira kamerak, argiak eta material moderno guziak ikustean eta dena euskaraz baliatzen dela ohartuz. Irri asko egin dute grabaketa garaian, eta badateke horretaz zozokeria bilduma baten idaztekorik, baina emaitzak biziki politak dira.
Publikoari tutorialen aurkezteko aukera ukan dute 2017ko ekainaren 21ean, txokolateari buruzko proiektuan parte hartu duten ikastetxe guziak elkarretaratu direlarik: Arruntzako eskola publikoa, Louis Dassance ikastola, San Frantses-Xabier kolegioa eta bistan dena Jondoni Bixintxo eskola. Bakoitzak zerbait erakutsi du: kantuak, liburu baten bideo aurkezpena (booktrailer), bideoak... eta etorri aitzin eginak zituzten txokolatezko goxokiak partekatu dituzte. Eskoletako ikasleak taldetan nahasirik, Txokolatea dokumentalean oinarritu galde-jokoan ari izan dira, eta orduan agertu da bazutela txokolateaz biziki ikasirik! Tutorialak Kanaldudeko webgunean zabalduak izanen dira ondoko hilabeteetan; ikasleek berantetsia dute!
Mirentxuren asmoa baitzen “euskara lau paretetatik ateraraztea” eta harremanen sortzea beste sail elebidunetako haurrekin, ageri da helburuak erdietsiak dituela. Gainera, sari gisa, biziki giro goxoa sortu dute ikasgelan...

Jondoni Bixintxo eskolako haurrak
Jondoni Bixintxo eskolako haurrak