Gelako leihotik - alfabeto filmatua

Mendibeko eskola publikoan 26 ikasle ibiltzen dira, CPtik CM2ra. Haietarik 20 sail elebidunean dira eta beste 6 sail elebakarrean. Bi irakasleek1 proiektu baten elkarrekin muntatzea deliberatu dute, adin guzietakoekin, euskaraz eta frantsesez ari direnekin, dinamika berri baten sortzeko xedez. Alabaina euskarazko postu erdi bat galdu dute aurten, baldintzak gaizkitu dira eta euskal giroak gibelera egin du. Hizkuntza mailaren hobetzea, talde lanaren lantzea eta euskal kulturaren ezagutaraztea hartu dute helburutzat eta Kanalduderekin abiatu dute proiektua2. Euskal alfabetoa iruditan liburuaren ildotik (Euskal alfabetoa iruditan, Gatuzain, 2001) “abecedario” edo alfabeto filmatua sortu dute.
Lehen urratsa hainbat alfabeto ilustraturi begiratzea izan zen, artean euskal mitologia gehiago ezagutu zuten ipuinak entzunez eta irakurriz. Mitologiako pertsonaia batzuk sarrarazi nahi zituztelako ilustrazioetan.
Ttipienek hizkiak nola idazten diren aztertu zuten, hitzak asmatu aitzin. Gero denek erranaldiak idatzi zituzten. Elkarrekin erranaldiak nola ilustra xerkatu zuten, argazkiak bilduz eta marrazkiak eginez.

Kanaldudeko Haitzek irudi heziketa saioak eman zizkien: planoak azalduz, zerbait filmatu aitzin saioa nola prestatu behar den azalduz, kameraren egokitzea erakutsiz... Euskaraz egin zuen eta eskolako laguntzaile batek itzulpena egin zuen sail elebakarreko 6 haurrentzat. Filma ez da euskara hutsez izanen. Hizkiak banatu ziren haurren artean, bakoitzak bere hizkia bazuen eta 6 ikasle elebakarrek frantsesez idatzi zuten beren erranaldia (euskarazko azpitituluekin). Hala ere, euskarak denentzat leku berezia badu proiektuan. Filmean erran zituzten erranaldiak gogoz ikasi zituzten eta horri esker, denek erran-molde eta hitz berriak ikasi. Usaian, euskara baliatzen dute matematiken lantzeko, eta batzuentzat dorpe da! Proiektuari esker, hats berria hartu dute euskaraz, eskolako gaietarik kanpo...
Eskolako bestaren karietara burasoei erakutsiko diete filma, eta bistan dena Kanaldudeko webgunean atzemanen da. Donibane-Garaziko Zitadelako kolegiora joateko asmoa dute, hango seigarren mailako ikasleekilako loturaren egiteko.
Alfabetoa ikusteko

1 Valérie Hariñordoki (euskara) eta Rachel Antoine-Binet (frantsesa)
2 Euskararen Erakunde Publikoaren eta APE buraso elkartearen diru-laguntzarekin

Ikus 2018ko martxoko Gelako leihotik - Emigrazioaz