Erakusleihoa - Xola eta Ameriketako izeba

Xola eta Ameriketako izeba [testu inprimatua] / Atxaga, Bernardo, Egilea ; Valverde, Mikel, Irudigilea. - Donostia : Erein, 2011. - 60 or. : kol. ir. ; 21 cm. - (Holaxe bizi da Xola ; 4) .

Xola txakurraren abenturen laugarren atala dugu Xola eta Ameriketako izeba. Aldi honetan bisonteen lurraldetik etorri den izebak Xola eta haren jabearen egun guzietako terrenta harrotzen du. Bide batez Xolaren sinesmenak eta aurreiritziak kordokatzen ditu...
Edonork bere burua ikus dezake hitz egiten eta irakurtzen dakien txakur ttipi honetan. Jendearen antza handia du, harroputza eta barneko kontraerranez betea da, baina biziki maitagarria ere, azkenean...
Xolak bere buruaz duen irudiak ez du bat egiten errealitatearekin eta izeba Clementinen aldera dituen aurreiritziak ere ez. Baina liburuko kondairan zehar iritziz aldatuko da Xola, eta bere burua hobeki ezagutuko du. Clementinek ere, bere aldetik, Xola den bezala ikusiko du. Atxagarekin askotan gertatzen den bezala, gai sakon eta filosofikoetan oinarritua da ipuina. Hots : Nor naiz ni, eta zer da libre izatea, bereziki besteen artean bizi garelarik ?
Liburu gomendagarria beraz, eta aipatu behar da bildumaren lehen titulua - Xolak badu lehoien berri – Frantziako Hezkunde nazionaleko erreferentziazko liburuetarik dela, euskarazko literaturako liburu bakarra, funtsean.
Argumentu? hori ez bada aski irakurle gazteen konbentzitzeko, testuaren eta marrazkien umorea aipa ditzagun. Ipuina errazki irakurtzen da ; erranaldiak laburrak dira eta elkarrizketek lekua handia dute. Marrazkiek liburuaren herena hartzen dute eta ulermena laguntzen. Zortzi urtetik goiti prezatzeko liburua.

Ikus 2018ko ekaineko erakusleihoa : Erakusleihoa - Mokotxiki