Gelako leihotik - Kontatzeko gaitasunen menderatzea ama eskolan

(eta albumen gozatzea)

Baionako Jules Ferry ama-eskolako gelan, saioa animatua da! 16 ikasleek albuma kontatu nahi dute... Xabier Olasoren Iker ikerlariaren iratzargailua liburua ongi ezagutzen dute eta egin duten lanari esker, albumaren irakurketa kontaketa moduan egiteko gai dira.
Alta, elebidun sarean izanki, bakarrik denbora erdiz ari dira euskaraz eta REPko eskola honetan (REP: Réseau d’Education Prioritaire, Lehentasunezko Hezkuntza-Sarea), buraso euskaldun guti dira.
Horregatik, Libreplume elkarteak proposatzen duen proiektuan parte hartzeko aukera baliatu du Ixabel Ahamendaburu errientsak bere 5 urteko ikasleekin. Haren helburuak: ama-eskolako ikasleak liburuetara hurbilaraztea, kontatzen trebaraztea eta burasoei haur literaturako tirria ematea, proiektuan partearaziz.

Ikasleek istorioaren sentsua anitz landu dute, hainbat euskarriri esker. Adibidez, txotxongiloak baliatu dituzte. Istorioa antzeztu dute txotxongiloekin, haur narratzaile baten ondoan.
Ana Imaz, Libreplumeko animatzailea bi aldiz joan da eskolara. Ikasleek haren laguntzaz kamishibaia erabili dute, kontaketaren araudien ulertzeko eta ipuinaren ongi barneratzeko.
Hiztegiaren eta egituren lantzeko, memory motako jokoak, hitz joko batzuk eta asmakizunak baliatu dituzte.

Ikasleek albuma gozatu dutela, plazerekin proiektuan parte hartu dutela eta emeki emeki aitzinatu direla ikustearekin, poztu da Ixabel. Eskolako usaiak inarrosi ditu proiektuak, eta dinamika sortu. Askotan gertatzen den bezala, aldi honetan ere, denbora labur gertatu da ikasleen lana familiei eta eskolako lagunei ongi erakusteko. Baina Libreplumek antolatzen duen Bouquinville egunean, gelako buraso eta ikasle batzuk Xabier Olasolaren ezagutzera joan dira eta gainera, animatu duen tailerean parte hartu dute.

Ikus 2018ko ekaineko Gelako leihotik - alfabeto filmatua