Poesia nahas-mahas adin guzientzat... “Izarrekilan pestan dugu zerua”

Manex Pagolaren oroitzapenetan...

Ardiak lerro lerro
(Astiria mendian)

Ardiak lerro lerro mendi maldan doatzi
Haize firfira batek deituz gorago beti
Ibai zola erreketan denak lotan sartzen dira
Zoin amultsua zautan gaua jausten mendira.

Egunaz ixil bazen gauaz pizten mendia
Belar punta bakotxak nasai dakar bizia
Gaztain ondotan kukiak joiten dauku soinua
Eta izarrekilan pestan dugu zerua.

Oroituko naiz beti Arradoiko bazterrez
Horrarat so gelditu bainaiz maiz bi begiez
Baina orain ezin dut zangorik hor finkatu
Bizi bihurri hunek bainau hortik urrundu.

Manex Pagola
https://www.youtube.com/watch?v=av9WFUWMs4w

Urtxintxak
Urtxintxak oihanean
jauzika,
aldaxkatik aldaxkara…
“Zuk erradazu, ama,
zendako
ez diren erortzen lurrerat?…”

“Nik ere nahi nuke izan
urtxintxa bezala!
Hain gora, hain trebe,
izaiteko libre!…“

Urtxintxak oihanean
zintzilik,
Buruz behera buztanetik!…
“Zuk erradazu, ama,
zendako
ez duten buruko minik?..”

“Nik ere…“

Urtxintxak oihanean
karruxkaz,
neguko bildu intzaurrekin…
“Zuk erradazu, ama,
zendako
ez dezakedan egin berdin?..”

“Nik ere…“

Manex Pagola
https://www.youtube.com/watch?v=6ILnaZhJ76g

§§§§

Belea eta axeria
 
Bele beltxak haragi puska bat mokoan
jan gogoa zadukan, haitz baten kaskoan.
Axeria ihizin han gaindi baitzoan,
usainka eta beha trikatzen zaio han.
 
«Egun on, Musde Bele, zer jaun ederra zu!
Zure lumen dirdiraz llilluratzen nauzu.
Kantari eder baten fama ere duzu.
Nahi zintuzket entzun; eia, kanta (e)zazu».
 
Belea lorietan hasten da kantatzen,
duelarik zehe bat mokoa zabaltzen.
Bere zitzia zaio lurrerat erortzen.
Axeria hain xuxen altxatzeko han zen.
 
Axeriak: «Milesker, dio beleari.
Ez gaite(ze)la, to, fida lausengariari,
ez eta ere gure eder usteari.
Jaki hau daiat hartzen hitz on horren sari».

Gratien Adema, «Zaldubi»
Kanta eta neurtitz hautatuak
https://klasikoak.armiarma.eus/idazlanak/A/AdemaKantikak036.htm

Larrazkena

Elgar aditurik
inarak jadanik
multzoka badatza
iguzki aldera.
Arbolan hostoa,
pilpiran egon’ta,
airean badoa.
Haizeak trumilka,
nahasiz ufaka,
Hostoak (di)tu biltzen,
Arbolak buluzten.
Ixil, larrazkena,
hemen dugu jina.

MJ Minaberri

Eguzki amandrea
Eguzki amandrea,
zer dakarzu berri?
Udazkena da eta
hostoak erori.

Udazkena, Anjel Lertxundi, Erein, 1989.

Korri, korri
Korri, korri,
egin reset denborari

Zapata bat utzi nuen
zure etxeko atean;
jantzi eta zatoz, korri,
korri, laster batean.

Zeharkatu bizitza.

Itzal bat nauzu,
negua nauzu;
egizu argi
maite banauzu.

Senda zauri sakon hau.

Zapata bat utzi nuen
zure etxeko atean;
jantzi eta zatoz, korri,
korri, laster batean.

Maite poemak hasiberrientzat Juan Kruz Igerabide, Denonartean, 2016.

Ikus 2018ko ekaineko Olerkia Goizeko eguzkitan