Tutu luzeen bitartez, ikasleek olerkiak xuxurlatzen dizkiote batak besteari. Gogotik ari dira, hizkuntza-jakitate maila ahantzirik, euskararen musikaltasunaz eta olerkaritzaz gozatuz. Ikasleen arteko konplizitatea ageri da, irri zabalak, euskarazko olerki garaikideen inguruan sortuak...
Hau zen Itziar Madina Baigorriko Jean Pujo kolegioko irakaslearen helburua: euskal olerkiak eta olerkariak manera gustagarri eta ez inposatuan lantzea seigarren mailako ikasleekin. Horregatik, duela zenbait urte Kalabazan taldearen eta xuxurlarien berri izan zuelarik, Baigorrin proiektuaren gauzatzeko parada ikusi zuen eta ausartu zen bideratzera.
Ekitaldi horretan, seigarren mailako ikasle guziek parte hartu zuten, bai sail elebidunekoek, bai sail elebakarrekoek, sail artekotasunean oinarritzen den proiektu batean. Alabaina, frantseseko kurtsoetan olerkigintzaren teoria pixka bat ikasi ahal izan zuten.
Euskarazko kurtsoetan, lehenik, ikasleek hautatu zuten zer olerki xuxurlatuko zuten. Gero, denek betan landurik, memorizazioa hasi zuten, urraska. Segitzeko, Kalabazan taldekoek emandako zenbait olerki grabatuak ikasgelan entzun eta ulertu zituzten. Ikasleek hautaturiko olerkarien inguruko bilaketa biografikoak egin eta euskaraz azaldu zituzten, lan notatuaren parte gisa. Bukatzeko, xuxurlarien emanaldia 2018ko maiatzean egin zuten.
Hizkuntzaren lantzea baldin bazen ere egitasmo honen oinarrian, egiteko maneraren aldatzea da gehienik kausitu. Alabaina, ikasleak usaiako testuingurutik ateratzen ziren xuxurlariei esker. Haien zentzu guztiak (ulermenetik harago, entzumena, irudimena, ukimena...) landu behar izan zituzten. Ekintza gustagarria gertatu zen, intimotasunari ere dei egiten ziolako.

Kalabazan taldekoekin aritzeak anitz ekarri du: jakintza, materiala... Kanpoko eragile aditu baten laguntza prezagarria da, ezen horrek ikasleekiko beste lotura mota bat sortzen du. Ekitaldiaren alderdi jostagarriari esker, ikasleak jokoan sartzen dira eta emaitza ederra erdiesten da. Horrez gain, ikasleak, jatorriz eta modu naturalean euskaraz hitz egiten duten eragile kultural gazteekin mintzarazteko parada da.
Ekitaldi zinez aberasgarria beraz, parte hartu duten guzientzat...
Ikasleek hautatu eta xuxurlatu zituzten hainbat poema hor atzematen dira.
Ikus 2018ko azaroko Gelako leihotik - Kontatzeko gaitasunen menderatzea ama eskolan

IKASOLAS