Poesia nahas-mahas adin guzientzat... Sekretu xuxurlatuetan

Gaua 
Euria, bustia
Zilarrezko zerua
Zuhaitzen distira
Txorien Z dantza
Alde batetik bestera
Oihaneko bakea
Lainoa, isiltasuna
Gaua
Supazter 
Supazter beltza 
Lupu sarez estalia
Supazter zaharra
Hire barnean 
Zenbat egur erre duk
Non dira hemen
Berotzen zirenak?
Itsasoa 
Itsasoa 
Zure musika
Ene bihotz
Minbera

Olerki bilduma /Une vie de poèmes, Marikita Tambourin, Maiatz, 2018
Gureak

Besteen jantzitan
besteen zerupean
besteen bidetan
besteen makil(a)pean
makurtuz 

besteen maitemiñetan
besteen mirailez
besteen soetan
besteen hitzekin
kurubilkatuz 

besteen hasarrekin
besteen horditzean
besteen leizetara 
besteen heriotzez
amilduz 

Gureak egin 

Olerki, ipuin eta olerkia, Mayi Pelot, Maiatz, 2019
Haizea gidari

Haizea gidari
Hodeiak bidaiari
Haizea gidari
Zeru margolari

Hodeiak zuriak direlarik
denek iduri dute kotoizko!

Hodeiak gris-grisak direlarik
aterkiak atera beharko!

Haizea ufaka badabil gaur,
zerua bihar da urdinduko!

Barnetik: Haur kantuak / Josiane Aguerre-Valencia,, Philippe Albor, IKAS euskal pedagogia zerbitzua, 2017

Bazter ahantziak

Bazter abandonatuetan
mintzo zaizkit, 
soilik neri, sekretu xuxurlatuetan,
eskuz eta aitzurka, 
mendien azken muturreraino,
larretik atera ziren 
belardi herabeak. 

Eskuzka, metatu ziren 
harri kozkor baztertuak, 
hesi sendo uhinduen altxatzeko,
gaur galdu edo erdi eroriak,
iragan izerdien lekuko ahulak,
soilik neri, mintzo zaizkit
sekretu xuxurlatuetan. 

Segaz mozten ziren 
iraleku erdoilduak 
hain artoski artatuak,
kamantza eta ongarri ketsu,
orduko eskasak, gaur soberan
xutik galduko direnak, 
oihu ito gorritan mintzo zaizkit. 

Urrats nekatuak
bildu dituzten bidexka gordeak, 
aihotzen ahoz idekiak,
sasi nagusituek janak,
arantz(a) saminak baztertuz,
lahar oldartuen petik,
dei minduetan ari zaizkit. 

Kaskoetaraino landatu diren oihanek,
heldu ziren xenderen 
eta auzoko etxe xurien 
bista estaltzen dautatelarik,
ikusmira aldatuen artetik, 
paisai ebatsiak,
sekretu xuxurlaka, mintzo zaizkit. 

Belardi, sasi, laharretan,
iraleku, harresi, bidexketan,
oihanek iretsi etxeetan,
isilka dirauten eleetan,
dilindan dirau nere izaiteak,
ahantzitako zoko galduetan,
auhen zintzilikatuetan. 

Luixa Giltzu
Maiatz. Aldizkaria 63. zenbakia, 2016ko azaroa

Ikus 2019ko azaroko olerkia Zilarrezko mundua amets dezaket