Poesia nahas-mahas adin guzientzat... Gauerdian leunki dabil brisara arina (IKASOLAS)

Dortoka txikia poema

“Ai ze problema handia,
ai ze handia problema”,
kexu zen dortoka txikia
dena kezka, dena dilema.
Irentsi zuen marrazoak
eta akabo bere arazoak.

Mamua

Mamu bat dabil
jira eta bira
etxeko egongelan.

Bere izara zuria
jira eta bira
etengabe hegan.

Astuna da gero
jira eta bira
astuna benetan.

Haren atzetik nabil
jira eta bira
eta bera ihesean.

Ikasiko du bai
jira eta bira
garbigailu barnean!

Joemak eta polasak / Iñigo Astiz, Maite Mutuberria, Elkar, 2019

Arrautza oskola kraskatu da
eta bat-batean isiltzen ez dakien oihua.
Intsektu eta harren bila doa ama.
Luma bat utzi die habian.
Eta ihes egiten dakien beroa.

Jaiotzeko
mundu oso bat
hautsi behar da.

Etxeko urak / Leire Bilbao, Susa, 2020

Jirafak

Jirafak,
lepaluzeak,
lepo luzeak!

Muttur luzeak,
hanka luzeak,
buztan luzeak,
gorputz luzeak!

Jirafak,
lepaluzeak,
lepo luzeak!

Lepo luzeak,
lele luzeak,
popo luzeak,
lulu luzeak!

Jirafak,
lepaluzeak,
zepo leloak!

Altxalili / Amaia Hennebutte, ZTK, 2013

Ez bazara nitaz akordatzen!

Gauerdian leunki dabil brisara arina
Ur geldiaren axala kirimolatzen,
Hostoak espazioan, goiti eta beheiti irristan
Isiltasunaren kristalean jostatzen,
Erreka zintzurrak beheiti, bihurrika datoz urak
Gau lamien adatsak txirikordatzen...
Hutsetik zintzilik ari dira armiarma jostunak
Amodioaren sare finak brodatzen,
Baina, zer ajola dit niri, edertasun guzi horrek
Ez bazara nitaz inoiz akordatzen.

Isileko kantak / Patziku Perurena, Pamiela, 1993
IKASOLAS