Elhuyarren hiru baliabide ikastetxeentzat lagungarri
Elhuyar hiztegia
25 urte bete ditu aurten Elhuyar hiztegiak, eta berritu dute.
Elhuyarren 3 hiztegi elebidunak (euskara-gaztelania, euskara-frantsesa eta euskara-ingelesa) biltzen ditu, eta oso erabilerraza da. #ElhuyarrenGomendioak atalean, euskaraz ondo idazteko eta hitz egiteko irizpide eta gomendioak aurkituko dituzue.
Webgunean kontsultatzeaz gain, Android eta iOS gailu mugikorretan instala daiteke aplikazioa doan.

Elia itzultzaile automatikoa
Ikastetxeek itzulpen-lan asko egin behar izaten dituzte, familientzako oharrenak besteak beste. Bada, horiek hizkuntza batetik bestera errazago pasatzeko, tresna bikaina da Elia. Sei hizkuntzaren arteko itzulpen automatikoak egiten ditu, doan: euskara, gaztelania, frantsesa, ingelesa, katalana eta galegoa.

Aditu hizketa-ezagutzailea
Audio eta bideoen garaian bizi gara, eta haietako testuak automatikoki transkribatzeko eta azpititulatzeko aukera ematen du Aditu hizketa-ezagutzaileak. Bereziki erabilgarria da tresna ikasleek ikastetxeetan egiten dituzten bideoetarako.
Bestalde, inklusibitatea gai garrantzitsua da dibertsitate funtzionalak kontuan hartu nahi badira. Aditu hizketa-ezagutzailea oso erabilgarria izan daiteke entzumen-arazoak dituzten ikasleak ikasprozesuan behar bezala txertatzen laguntzeko. Lehendik grabatu bideoak eta audioak nahiz unean uneko hitzaldiak testu bihurtzeko balia daiteke.

Proiektu berri bat sortu du BERRIA egunkariak: Ikasgela
12 urtetik aurrerako ikasleekin eskola orduetan lantzeko gaiak proposatuko ditu webgune batean, Berria.eus/ikasgela helbidean. Material osagarria eskainiko dio hezkuntza komunitateari.

Audio-liburuak
Argia aldizkariaren artikuluan
“Internetera jo behar gaur egun audio-liburuen bila. Ez da erraza euskaraz nazioartean ohikoa bilakatu diren moduko liburu osoak topatzea, gehiago dira ipuin eta poema solteak. Susa argitaletxearen webgunean eta armiarma.eus atarian topa daitezke hainbat testu irakurri, horietako asko idazlearen ahotsean. Wikipedian ere entzungarri daude literatur testu batzuk, horiek ere idazleen ahotsetan. Booktegi.eus proiektuaren webgunean eta Pako Eizagirreren aittu.eus atarian ere entzun daitezke literatur testuak. Alternatiba eta utopien etorkizuna irudikatzen duten ipuin laburren Zirriborroak eta gero bildumako fabula guztiak ere entzungai daude idazleen ahotsetan, proiektuaren webgunean. Etxegiroan.eus webgunean ere asko dira entzun daitezkeen ipuin eta liburuak, haurrentzako zein helduentzako.”
IKASOLAS
IKASOLAS