Libreplume elkarteak irakurzaletasunaren bultzatzeko egitasmoak eskolei proposatzen dizkie 2015etik. Aurten, besteak beste Xabier Olaso idazleari buruzko proiektu bat antolatu zuen, eta bost eskolatako bederatzi ikastaldek hartan parte hartu zuten: Bokaleko ikastola, Baionako Oihana ikastola, Angeluko Kimua ikastola, Baionako Zezen plazako eskola publikoa eta Jules Ferry ama eskola.
Pascale Pedeflous Jules Ferry eskolako errientsak proiektuan parte hartu zuen Kattina Martin lankidearekin. Bi gela dituzte: ttipien eta ertainen taldea, euskarazko irakaskuntzan ari dena, eta parekotasunaren sisteman (erdia frantsesez, beste erdia euskaraz) ari den handien taldea.
Lehenik, Ana Imaz Libreplumeko animatzailea gelara jin zitzaien liburuen aurkeztera. Xabier Olasoren liburuen zerrenda biziki luzea da, eta lau album landu zituzten bereziki: Ilargiaren kulukantari bildumako Biolina, Bost eta Krokodiloa albumak (Pamiela) eta Iker ikerlariaren iratzargailua (Ibaizabal). Anak albumak irakurri zituen, eta haietan oinarritu lan saioak proposatu zizkien ikasleei. Joatean, sorpresa moltsa bat utzi zien. Barnean, irakurtzeko jokoak, sorkuntzako jarduerak... lau aste barne egiteko:
 Biolina liburuan oinarrituz, memoria joko baten sortzea, musika tresnen soinu berriak asmatuz.
 Krokodiloa albumean oinarrituz: liburu baten sortzea.
 Maketa baten laguntzaz, Iker ikerlariaren iratzargailua ipuinaren kontatzea.
Horrela, ikasleek hurbiletik ezagutu zuten Xabier Olasoren lana eta haren unibertsoan sartu ziren.
Hurrengo etapa haren etortzearen prestatzea izan zen eta harekilako elkarrizketako galderak sortu zituzten.
Xabier Olasorekilako topaketa biziki memento polita izan zen. Haurrei Bost albuma biziarazi zien (mugituz, musika joz, dantzatuz, kantatuz...).
Irakasle gisa, Pascale haurren plazeraren lekukoa izan zen: irakurketaren plazera, idazlearen topatzeko plazera... Ikusi zuen liburua edo ipuina bizitzen zela autorearekin.
Pedagogia saileko helburuak bete zituzten: euskarazko testuak entzun eta ulertu zituzten ikasleek, hizkuntza landu zuten hiztegia garatuz eta aberastuz, hizkuntzarekin jostatu ziren, hizkuntzak eskaintzen duen aberastasunaz baliatuz: olerkia, onomatopeiak, errimak... Hitz eta silabekin jostatu ziren.
Azkenik, Jules Ferry ama eskolako blogean zabaldu zituzten egitasmoaren berriak eta argazkiak. Eskolako obrak aurkeztu zituzten Bouquinville ttikia festibalaren karietara antolaturiko erakusketan.
Pascalek biziki preziatu zituen Anaren kemena eta sortzeko gaitasuna. Horrelako egitasmoak aukera ezin hobeak dira hizkuntzaren gustua emateko eskolatik kanpo euskara guti entzuten duten haurrei!

2022ko martxoko Gelako leihotik: Lehen Mundu Gerlako gutunak
IKASOLAS