Agur Andereñoak!
Egun on atsedenak!
Adio ene lagunak!
Kaixo pausa luzeak!

Biba, biba uda!
Gora bakantzak!
Biba, biba uda!
Aupa, oporrak!

Ciao! Bye! Bai!

Ikus arte kaierak!
Luzaro lotan egon!
Berriz arte kontsignak!
Luzaz isilik egon!

Ez, ez adiorik lanak!
Iep, iep, alferkeri!
Ciao ebaluaketak!
Bidaia on zueri!

Amaia Hennebutte – begi blue, ZTK, 2012

Zorri bat zuen zerriak,
zerri bat zuen zorriak.
A zer zorria zerriak!
A zer zoria zorriak!
Zerriak zer?
Zorriak zor!
Zorri bat zuen zerriak,
zerri bat zorriak.
A zer zoria zorriak!
Eta zerriak?

Xomorropoemak, Leire Bilbao, Maite Mutuberria, Pamiela, 2016

Txoriñoak kaiolan tristerik dü kantatzen
Düalarik han zer jan zer edan
Kanpoa dü desiratzen
Zeren, zeren libertatea zoinen eder den
(...)
Txoriñoak kanpoan alagera kantatzen
Ez düalarik han egünoroz zer jan
Badaki zer düan gozatzen
Zeren, zeren libertatea ez den galtatzen.

Txori M - René Martinez, Mixel Etxekopar, Christian Vieussens, ZTK, 2022

Hor dago, munduaren azalean,
Batzuetan isil, besteetan haserre,
Nehork ulertzen ez duen hizkuntza
batean mintzo eta mintzo
alta beti zintzo,
irri eta negar artean nire
hodei, laino eta euri herria.

Sorginak, arrantzaleak, langileak
eta alferrak biltzen dira auzolanean
destino anitzak txirikordatuz
kantari eta dantzari
hego haize balakari,
harpe eta hiri artean nire
hodei, laino eta euri herrian.

Ametsaren uhinetan, etorkizun eta
elkartasun bila goaz erroak landatuz
gure lurraren errauts arinean
ez naiz hemengoa
ez eta hangoa
joan eta etorri artean nire
hodei, laino eta euri herritik.

Urriko argitasun urreak distiraz janzten
ditu mendiak, karrikak eta itsas hegiak
maitasun desioak sustatuz,
zabalduko dira bihotzak,
ahantziko ditugu negu hotzak
bihar edo etzi itzuliko naizenean nire
hodei, laino eta euri herrira. 

Uhartearen mugetan, Itxaro Borda, Maiatz, 2022