Tituluak iradokitzen duen bezala, Tik, bakarrik, tak, ikarak albumak beldurra aipatzen du.
Narratzailea Edda ttipia da. Bere burua ttipi-ttipia ikusten du “etxeko txikiena, gelako txikiena, munduko txikiena”. Gainera, mintzatzeko zailtasunak ditu, hitzak hankaz gora jartzen ditu ahoskatzen dituelarik. Iduri du ez duela sobera handitu nahi ere...
Arrats batez, Eddaren aita bazkaria ari da prestatzen alaba eta semearekin, dei bat jasotzen duelarik. Amona eritu da eta aitak ospitalera eraman behar du seme-alabak bakarrik utziz. Ama urrun da, telefonoaren beste aldean. Beraz Edda bakarrik egonen da bere anaia ez hain handiarekin, eta beldur da.
Aitak utzi dituen mementotik denbora luzatzen zaio Eddari eta beldurra eta bakartasun sentimendua emendatzen.
Maite Gurrutxagaren marrazkiek denboraren luzatze hori ongi adierazten dute. Ilustrazio guziak ikuspuntu beretik eginak dira, plano finko luze bat bezala. Ilustrazioen estilo estatikoak – lauki eta marra zuzen anitzekin – gelditasunaren sentsazioa indartzen du. Lehen begi kolpez, iduri du fitsik ez dela aldatzen marrazki batetik bestera, orrialde batetik bestera, beti sukalde bera ikusten dugula. Baina hobeki aztertuz, mugimendua hautematen da: haurrak lekuz eta aktibitatez aldatzen dira, ordulariaren orratzak aitzina doaz (emeki-emeki...), sagu bat han-hemenka ibiltzen da, koadro bateko arranoa hegaldatu da testuari oihartzuna eginez... Eta ordularia gero eta handiagoa da, leku gero eta gehiago hartzen duelako haurren gogoan... “Erlojuaren tik eta tak horiek guztiak. Baina aita joan denetik gehiago entzuten dira: tik, tak... Kanpai hotsak dira orain.”

Testuak neska narratzailearen dudak eta beldurrak haur ttipi baten ikuspegitik adierazten ditu. Irakurgaian aitzinatu arau, neska handitzen ikusten dugu, ahalgabetasunaren sentsazioa pixkanaka-pixkanaka gainditzen ari dela.
Patxi Zubizarretaren ohiko estiloko obra dugu aldi honetan ere: testu fina du, eta irakurlea hunkitzen. Elkarrizketetan oinarritzen da narrazioa, beraz ulerterraza da. Euskara sinplea du baina ez pobrea. Hitzekin eta soinuekin jolasten da idazlea, tituluan bezala.
Handitzearekin zerikusia duen album polita da hau ere, 4 urtetik goitiko haurrei egokia...

Tik, bakarrik, tak, ikarak, Patxi Zubizarreta , Maite Gurrutxaga - Ikaselkar (2021)

2022ko ekaineko Erakusleihoa: Bisitari bitxia
IKASOLAS