Urte guziez, Euskal Haziak elkarteak, eskola giristino elebidunen ikasleen burasoak, irakasleak eta ikastetxeetako zuzendariak biltzen dituen elkarteak, eta lehiaketa literario bat proposatzen du. Ipar Euskal Herriko ikastetxe giristinoetako ikasle elebidun gehienek horretan parte hartzen dute. 4 sail dira: 3. zikloa (CM1eta CM2 mailak, eta kolegioko 6.a), 4. zikloa (kolegioko 5.a, 4.a eta 3.a) eta 5. zikloa (lizeoko hiru mailak), baita burasoen saila ere.
2021. urtekoa zazpigarrena zen. Hendaiako Saint-Vincent kolegioko 100 bat ikaslek - seigarren mailatik hirugarrenera - hartan parte hartu zuten.
Irene Noriega euskarako irakaslearen arabera, helburu pedagogiko anitz ditu proiektu horrek, eta horregatik parte hartzen du urtero: “Lehenik, bistan denez, idazmena lantzen dute ikasleek narrazio bat euskaraz idatzi behar baitute. Ikaskideen lanak irakurriz, irakurketa ere lantzen dute. Horrez gain, zeharkako gaitasunen aldetik, narrazioak banaka edo taldean egin daitezkeelako, proiektuak talde-lana bultzatzen du. Bukatzeko, norberaren sorkuntza garatzen laguntzen du eta hori prezagarri da, kolegioetan denbora gutxi eskaintzen baitzaio gaitasun horri.”
Ipuinen idazteko, Euskal Haziak elkarteak gai bat proposatzen du zikloka. Adibidez, 2021ean, narrazio baten hasiera proposatu zuten hirugarren zikloarentzat: Damu nuen hori erranik. Han, hondartza bazterrean... Ikasleek narrazio hori jarraitu/osatu behar zuten.
Hendaiako Saint-Vincent kolegioko ikasleek ipuinak euskarako kurtsoan idatzi zituzten. “Proiektua bi orduz garatu genuen. Lehenik,lehiaketaren baldintzak eta proposatutako gaia elkarrekin irakurri genituen. Ondotik, taldeak egin eta ordu bat eta erdi ukan zuten nork bere ipuina idazteko.” Kolegioan baliatzen ikasten dituzten hizkuntza-tresnak erabili zituzten.

Euskal Haziak elkarteak epaimahai bat osatzen du lan hoberenen hautatzeko. 2021ean, Saint-Vincent kolegioko seigarreneko ikasleek bi sari eskuratu zituzten: hirugarren zikloko banakako lehen saria eta taldeko lehen saria.
Irabazleen obrak Euskal Haziak elkarteko aldizkarian agertzen dira, jende guziek irakurtzen ahal izateko gisan. Herria aldizkariak ere ipuinak argitaratzen ditu astez aste.
Irabazleak sariztatuak dira (iaz ur-parke bateko sarrerak eskuratu zituzten) eta oso motibatuak hurrengo urtean ere parte hartzeko.
“Irakasle gisa oso proiektu interesgarria iruditzen zait. Sariak direnez, ikasleak oso motibatuak izaten dira eta oso serio hartzen dute lehiaketan parte-hartzea. Motibatuak dira hurrengo urtean ere parte hartzeko.”

2022ko ekaineko Gelako leihotik: Xabier Olasoren sekretuetan
IKASOLAS