hotzikara bat
baso ilunekoa
gogoratzen dut

leihoan euri
udazkenaren mintzo
barrura bildu

Tantaka
Peru Magdalena

Dakienak badaki
nora goazen jakiteko behar dugula
nondik gatozen jakin
eta norengandik garen.

Nondik goazen
eta nora goazen jakin,
non gauden jakingo badugu
eta nor garen, jakina.

Nor garen jakin,
garenak izan gaitezen;
non gauden jakin,
gaudenean egon gaitezen;

gaudenean egonik,
garenak gaitezen
garenak izanik,
gaudenean gauden.

JosAnton ARTZE “HARTZUT”

Botila itsasoan

Botila itsasoan
barruan
mezu batekin.

Ez du eskutitzik
barruan
ura ez besterik.

Botila itsasoan
barruan
beste itsaso batekin.

Iñigo Astiz - Joemak eta Polasak

Lertsunak
Lertsuna, lerro, lerro,
Zeruan gora, gora,
Badoa lerro, lerro.
Negua hor da, hor da,
Su ondo bero, bero,
Etxean bada, bada.
Lertsuna, lerro, lerro,
Jinen da gero, gero,
Ekarriz goxo, goxo,
Iguzki bero, bero.

Marijane Minaberri - Xoria Kantari

Udazkena galtzetan

Udazken lerden:
hiru tanta garden,
bi hodeian behera datoz,
galdezka,
bestea non ote den.

Udazken xaramela:
teilatuak mela-mela,
argilunetan jostetan
argia eta kandela.

Udazkena galtzetan:
ikastolan orbelak,
biluzik,
laztan isilean.

Xabier Olaso - Pupuan trapua, Pamiela 2004

Udazkena

Firin firain
hostoak apain
hostoak apain
firin firean
hostoak airean
lurraren bidean
firin firain
hostoak sustrai

Pello Añorga