Azken hilabeteotan, Guk taldearen kantuek berrialdi bat bizi dute. Izan ere, ‘Guk eta gü’ deitzen den ekimen eder baten karietara, hiru ikastetxetako haurrek Guk taldearen kantuen ezagutza egin dute eta batzuk ikasi. Tulalaika elkarteko burasoek (Seaskako Xiberoko burasoek) proiektu hori bultzatu dute eta hainbat eragile artistikok parte hartu dute.
Proiektuak 200 bat ikasle bildu ditu: Sohütako Eperra ikastolakoak, Alozeko ikastolakoak eta Manex Erdozaintzi-Etxart kolegioko 6. eta 5. mailetakoak.

Mayi Saint-Esteben Manex Erdozaintzi-Etxart kolegioko dokumentalistak azaltzen duen bezala, proiektua biziki aberatsa izan da kulturalki eta pedagogikoki. Lehen mailaren eta kolegioaren arteko loturaren azkartzeko aukera izan da eta hainbat gai landu dituzte sailen arteko loturak eginez: euskara, frantsesa, musika... Berriki historia markatu duen musika talde baten ezagutza egin dute ikasleek eta beren ondarea ezagutzeko parada ukan dute.
Lehenik, Mayiren laguntzarekin, kolegioko ikasleek ikerketak egin dituzte garaiko testuinguruaren eta Guk taldearen hobeki ezagutzeko; Badok ataria baliatu dute, besteak beste. Euskal kantagintza berriaren hastapenen eta frankismoaren garaiaren lantzeko, Colette Larrabururen Francoren mende kantatzen genuenean liburuaren pasarte batzuk landu dituzte. Garai desberdinen irudikatzeko, Frantxua Teillagorrik bildutako 1960, 1970 eta 1980 hamarkadetako afixak eta pegatinak aztertu dituzte.
Iturri fidagarriena, bistan dena, Guk taldeko kantariekin trukatzea izan da eta kolegiora etorri zirelarik memento biziki aberasgarria eta hunkigarria bizi izan zuten.

Material horretan oinarrituz, Berritza konpainiako Maika Etxekoparek antzerki partea idatzi du eta kolegiokoekin muntatu. Antzerkiaren lantzen ari izan dira Maikarekin, eta kantuak ikasi dituzte Intza Daguerre musika irakaslearekin. Ikasgai akademikoez gain, oinarrizko gaitasun batzuk garatu dituzte: memorizazioa, gorputza eta bozaren lantzea, nork bere lekua taldean atzematea, arau amankomunen errespetatzea... Ikasle batek erran duen bezala, “ Konfiantza emaiten du jendeen aintzinean hitz egiteak”. Elkarren arteko harremanak ainitz landu dituzte eta proiektu kolektiboko ekoizpen baten burutzen lortu dute.

Ikastoletako haurrek kantuak eta musikak ikasi dituzte Mauleko musika eskolaren laguntzarekin.
Epe luzeko proiektu horren emaitza maiatzaren 26an agertu da Mauleko Jai Alaian: lehen mailako ikasleak eta kolegiokoak aritu dira publikoaren aitzinean.
Egitasmo zinez onuragarria da irakasleen iritziz, gazteen inplikazioa hastapen hastapenetik biziki baikorra ikusi dute, elkar laguntzen, entzuten... ikasleen arreta eta esku hartzea saioz saio hobetzera joan da. Antzerkilari batekin sorkuntza artistiko baten muntatzea biziki aberasgarria izan da. Transmisioren lantzea, eta trukaketa baita Guk taldearen eta ikasleen arteko trukaketa ere; hunkigarria zen eta segur oroituko direla!!! Eta espero dute proiektu horren bidez, ikasleei biharko eragile kultural bilakatzeko gogoa piztu dietela...
Gehiago jakiteko: https://www.irulegikoirratia.eus/tokiko-gaiak/guk-kantatuz-ikusgarria-maiatzaren-26an-mauleko-jai-alai-an

2023ko martxoko Gelako leihotik: Euskaraz loriatzea