Amerindiar Erreserbetako ondoezak Annie Maeren izpirituan izenarekin argitaratzen den liburu honek gertakizun gordin bat du ardatzean : 1976ko otsailaren 24an gorpu bat aurkitzen dute Pine Ridge lakotar erreserban. Lurra ematen diote eta gorpu ezezagunari Jane Doe izena jarri. 1976ko martxoaren 3an Jane Doe hura Annie Mae Pictou Aquash dela esaten du Washington DC-ko FBIk.
Annie Mae 1945 martxoaren 27an jaio zen Mi'kmaq erreserban, Shubenacadie ondoan, Kanadako Eskozia Berrian. 1970ean Amerikar Indiar Mugimenduarekin (AIM) lehen kontaktua izan zuen. Harrez geroztik, AIMk antolatutako zenbait ekitalditan parte hartu zuen, baita AIMko buruzagitzakoekin aritu ere. Hori dela eta FBIkoek behin baino gehiagotan atxilotu zuten. Atxiloketa horietatik aske geratu ondoren, AIMko zenbait jende Annie Mae FBIko informatzailea zela zurrumurrua zabaltzen hasi zen.
1975ko ekainean Leonard Peltierrek Annie Mae galdezkatu zuen jakiteko ea FBIko informatzailea zen ala ez. Peltierren iritziz, Annie Mae ez zen inolako informatzaile.
1975ko azaroaren 14an, tiroketa baten ondoren, Annie Mae berriz atxilotu zuten, AIMko buruzagi ziren Leonard Peltierrek eta Dennis Banksek alde egitea lortu zuten bitartean. Aske geratu ostean, AIMko jendearen artean berriz informatzaile zelako zurrumurruak hasi ziren.
Annie Maek eskutitz bat idazten die Kanadako bere ahizpei esanez beldur zela, FBI haren atzetik zebilelako, baita AIMkoen kontra zegoen Pine Ridge erreserbako zenbait jendez ere. 1976an Annie Maeren gorpua azaltzen da.