Arima naufrago bakartiak

Liverpool. 1814ko urriaren hamazazpia, Acushnet itsasuntziko marinelek ez zekiten zein zen heuren bidaiaren helburua, Afrika hegoaldetik iragan behar zutela salbu. Beltzez jantzitako agure batek, "deabruarekin itsasoratzen bahaiz berarekin egin beharko duk bidaia" esan zion grumeteari, kaian, baina mutikoak ez zion errefrauari garrantzirik eman. Eguerdirako belak zabaldu eta, haizea aldeko, abiatu ziren hegoalderantz.

Belak beterik, uhainak laban bortitz batez bezala ebakitzen ziren untziaren aurrean. Kalatxoriek, hagen artetik silioka, luzaroan lagundu zuten, eta izurdeek ere, egun oskarbi eta gau izartsuan, bidaien arnasa den brisara hozkirriarekin. Gorputz indartsu eta harro bat zen Acushnet izeneko belero hura itsaso zabalean, bere merkatari eginbideetarik ez okertu ez berandutuko zenik ez zirudiela. Lehen goizaldean marinel irlandar bat zegoen lema zaintzen. Kriseilu ahul baten antzera argitzen zuen ilargiak, uretan zilarrezko bide bat erakutsiaz, haizea suabea eta hotza, izarrek beren azken keinuak egiten, olatu malenkoniatsuak. Lemazainak dei misteriotsu bati amore emanaz, zilar bidera gidatu zuen untzia. Marinel irlandarra leman zegoen oraindik, gaua egun bilakatu zenean, eta ekialdean ortzea eta ura larrosen koloreaz tindatzen ikusi zuen. Lehorra urrun utzia zuten eta ez zen
inguru guzian itsasertzik igartzen.

Egunsenti hura ez zen izan besteen gisakoa, baina ez zen untzi haretako inor ohartu. Argi hastearen ederraz eta itsasoaren bareaz mintzatu ziren batzuk, baina garrantzirik eman gabe. Zerbait gertatzen ari zelako zeinuak, hala ere, ugari ziren. Kalatxori bat agertu zen branka aldean hilik, zauririk gabe. Eskoziar marinel batek sorterriko kantu bat abestu nahi ukan zuen, eta ahazturik zeukan. Upeletik ura hartzera joanik, hatsa zerion urari, eta ezin zen handik edan. Zerbaiten zeinu nabarmenak ziren, baina ez zituen inork aintzat hartu. " Ekaitza ekarriko du" esan
zuen soilik, marineletarik batek.

Joseba Sarrionandia, Narrazioak, Elkar, 1993

Hiztegia :

 Errefrau : atsotitz Hozkirri : fresko
 Labana : ganibet Kriseilu : argiontzi
 Kalatxori : antxeta Suabe : leun
 Oskarbi : hodeirik gabe Branka: proue

I – ULERMENA : (10 puntu)

Les élèves de série S ne répondent pas à la question 4.

1. Zein motako itsasontzia da Acushnet ? (L/2 ; S/2)

2. Zein funtzio du sarrerako beltzez jantzitako agureak ? (L/2 ; S/2)

3. Zer adierazten dute « ... uhainak laban bortitz batez bezala ebakitzen ziren untziaren aurrean» eta «Gorputz indartsu eta harro bat zen Acushnet...» baliabide estilistikoak ? Zein baliabide diren zehaztuko duzu. (L/2 ; S/3)

4. Azter ezazu ondoko irudia : « ... izarrak beren azken keinuak egiten, olatu malenkoniatsuak. » (L/2)

5. Zein dira azken paragrafoan zerbait gertatzen zela erakusten zuten keinuak? (L/2;S/3)

II – ADIERAZPEN PERTSONALA : (10 puntu)

Les candidats de la série S répondent à une question au choix.

1. Testu horren segida asma ezazu. (L5)

2. Acushnet itsasuntziko marinel baten gogoetak idatz itzazu. (L5)