Elurretan

Elurretan oinak, elurretan
Eskuak, elurretatik izenak, elurretara
Etzanak, elurretako hats zuria.

Elorriak xuri, larrosak xuri, izenak
Xuri, bekain zuriak, gogo zuriak, hauts
Zuriak, lepo zurietan musuak xuri.

Errekatik ahotsa dator; lotsa harri
Leunetan doa: bion artean larrosa.
Bihoa dardarotsa hortzotatik, bihoa.

Juan Kruz Igerabide, XX. Mendeko Poesia Kaierak (2002)
Gehiago irakurtzeko

EURIA

Plik! Plak! Plok!
Euria
Xingilka
Dabila.
Plik! Plak! Plok!
Jauzika
Punpeka,
Heldu da.
Plik! Plak! Plok!
Paisola behar da
Atera.
Marijane Minaberry Xoria kantari
(Oskorriren bertsioa Youtuben )

Mendian galdu direneri

[...]
Boteretsuak ilargiraino igan zauzkigun orduan,
nehoiz bezanbat injustizia ikusten dugu munduan:
batzuk dirutan emokatuak, gako guziak eskuan,
eta bertzeak ogia galdez, biziaren irriskuan.
[...]
Xalbador, Odolaren mintzoa (1976)
Bertso osoa irakurtzeko

Urtarriletik abendura

 1
 Urte Zaharra joan da eta,
 Berria gogo ta asmoz beteta.
 Nahiz elurrarekin herabeak
 seian datoz hiru Erregeak.
 Lehenengo hila,
 Hilbeltza edo ta Urtarrila,
 denontzat ona gerta dadila.
 
 2
 Bigarrengoa txarra ta hotza,
 Otsaila izenez ta da motza.
 Bostean dugu Santa Ageda,
 eta kopletarako bezpera.
 Ihauteriak,
 eta berdin sagardotegiak,
 Garizumaren mezulariak.
 
 3
 Hirugarrena hemen da Martxo,
 txarra bada ez ardi ez artantxo.
 San Josetan eguzkia bada
 bete-betean sartuak gara
 Udaberrian,
 kukuak Erromako zubian
 eta ondoren mundu guzian.
 
 4
 Laugarrengoa da Apirila
 baserritarrarentzat Jorraila.
 Hogeitabostean da San Markos
 eta xixa berriak ba datoz.
 Mendi aldera,
 zakur ta ardiekin batera
 artzaiak gorantz dira atera.
 
 5
 Aurrera segiz, hau da Maiatza,
 loretan bitez zelai ta baratza.
 Ta ez bada giro egokia
 berriz erre beharko aulkia.
 San Ixidrori
 otoitz eta erregu berari
 izan dezagun euri ugari.
 
 6
 Seigarrengoa orain heldu da
 Ekainarekin datorkigu Uda.
 Gure kukua zaigu mututu
 San Pedroz eginez azken-ku-ku-
 San Juanetan
 Su ugari bidegurutzetan,
 eta oporrak ikastetxetan.
 
 7
 Uztaila da opor garaia,
 arazo denak ahaztutzen saia.
 Bildurrik gabe -Gora San Fermin!-
 zezenaren aurrean hotsegin.
 Ta Santiotan
 edo berdin San Inaziotan
 parranda gauez, eguna lotan.
 
 8
 Ta abuztuko uda beroan
 jarraitzen dugu jai-festa giroan.
 Batzuk bertan besteak kanpora,
 baina hauxe dizuet gogora
 Euskal Herrian
 hobe bertan Aste Nagusian
 Gasteizen, Bilbon nahiz Donostian.
 
 9
 Uda lehorra, gozo-beroa
 Iraila dator eta badoa.
 Udazkenean sartu garenez
 lurra estali zaigu orbelez.
 Baserritarrak
 bildu onddo, hur eta intxaurrak
 ta eskolara gazte ta haurrak.
 
 10
 Hamargarrena dugu Urria,
 uso eta tortolen galgarria.
 Udazkenean hego haizeak
 ximeldu ditu piku hezeak.
 Txistu ta irriz
 artzaiak menditik bueltan berriz
 belar motxaren gose egarriz.
 
 11
 Hazi hila da, hazi aroa
 hamaikagarrengoa Azaroa.
 Gaua luzatu eguna moztu,
 eguraldia zeharo hoztu.
 San Martinetan
 Txerriak hil ta gazikutxetan
 neguko jana baserrietan.
 
 12
 Azkenekoa da Abendua
 eta berarekin dator Negua.
 San Nikolas eta Santo Tomas
 elurrezko makina bat jolas.
 Eta Gabonak
 direnez guztioi zorionak!
 Agur Urte Zahar ta esker onak.

Antton Cazabon
Gehiago irakurtzeko

Olerkia eta aho korapiloak - Haizea, olatuak, ikera...

IKASOLAS