Olerkia - Poesia nahas-mahas ororentzat (IKASOLAS)

Elur xuria

Elur xuri
mendietan
mendia xuri
elurretan
elurra xuri
elurretan
 
Kras-kras-kras
ibili naiz
mendian elurretan
oinak kras
kras oinak
 
Mendiak hartu nau
elurrak
besoetan
elur xuriak
xuri-xuriak
 
Egunsentia xuri
goizean
goiza xuri
egunsentian
egunsentia xuri
egunsentian
 
Arnasa sakon hartu dut
goizean egunsentian
arnasa sakon
goizak hartu nau
egunsentiak
besoetan
egunsenti xuriak
xuru-xuriak
 
Antton Kazabon, Hitz xuriak , Desclée de Brouwer, 2008

Errima arrimatua II

Zomorroak argira
barraskiloak eurira
ahuntzak mendira
eta saguak...
saguak ilargira.
 
Letrak belarrira
begiak hiztegira
zalantzak harira
eta ez direnak...
ez direnak ere badira.
 
Txikiak handira
lehorrak bustira
negua udaberrira
eta mundua...
munduak behin eta berriz
jin eta bira.
Datozen eta doazen bezala
zomorroak argira
 
Leire Bilbao, Piztipoemak eta beste xomorro batzuk , Pamiela, 2016

Urtats

Zoin den ederra
Urtas eguna!
Goizean goizik
Haurra jeikirik,
Ait’amen gana
Lasterka doa,
Desira onak
Aho-mihian,
Potta eztiak
Ezpain xokoan.
Urte on, aita!
Urte on ama!
 
Marijane Minaberri, Txoria kantari , Ikas, 1965

Negua

Biluzia da haritza,
biluzia pagoa,
beldurrez gorde da
urtxintxa harroa,
lañoan nahasi da
lertsunen lerroa,
atzarri du negu hotzak
iparren orroa.
 
Izotza hain da hotza,
elurra hain trebe,
mamutxen kasatzeko
funtsean baita hobe.
Xoriak ez dira geldi
gorde lekurik gabe,
izei eta gorosti
hor baitira berde.
 
Laster suntsituko naiz
horma bihotzean,
ni ezin bainaiz bizi
baizik eta hotzean,
deuseza eginen naiz
hartza atzartzean.
Udaberri piztuko da
ene heriotzean!
 

Arratsean

Izar arte garbia,
Ipharretik agertzean
Marinelen argia!
Bai, handizki eder dago
Zeru-zola handia...
 
Jean Barbier, Olerki hautatuak Hiria, 2006

Lau soineko

Urteak ditu lau soineko
sasoika dantzaz aldatzeko
 
Loreduna udaberriko
Eguzkitsua udako
 
Urteak ditu lau soineko
sasoika dantzaz aldatzeko
 
Urrezkoa udazkeneko
Zuri-zuria neguko
 
Josiane Aguerre-Valencia, Barnetik: Haur kantuak , Ikas 2017

Ikus 2017ko ekaineko Olerkia - poesia nahas-mahas: Izarren arteko bideak
IKASOLAS