Mokotxiki – Leire Bilbao, Maite Mutuberria - Pamiela, 2017. - Or. zenb. gabe: kol. ir.; 23 x 23 cm.
Behin bazen lurralde urdin erraldoi bat eta lurralde horretan puntu gorri ttipi bat.
Behin bazen hipopotamo indartsu bat eta haren bizkarrean zegoen txori ñimiño bat.
Mokotxiki txoria uros zen bere lagun urdinaren gainean, bere lagunaren mundu urdinean. Behar zuen guzia bazuen: jatekoa, edatekoa, bere buruaren gerizatzekoa... Ez zuen fitsik falta. Gainera, hipopotamoak bezala orro egiten zuen etsaien haizatzeko, eta bi lagunen orroak entzunez, denak izitzen ziren.
Bizkitartean, egun batez, Mokotxikiak orro egin zuen beste hipopotamo batzuen aitzinean eta hauek Mokotxikiaz trufatzen hasi ziren. Orduan ohartu zen, hipopotamoak ez ziola garrantzi handirik ematen. Txori ttipi gorri bat baizik ez zen, kasik ahotsik gabekoa. Ohartu zen bere orroek ez zutela deus balio, hipopotamoen artean irria sortzen zuten eta txorien artean, beldurra.
Bere baitako ahotsa eta hizkuntza atera zituelarik baizik ez zen gai izan bere nortasunaren adierazteko, ozen eta harro. Horren bidez, hipopotamoaren mendekotasunetik askatu zen, eta ele eta kolore anitzetako mundua kausitu.
Diglosia da albumaren mamia. Eta mezua argi izan dadin, liburuaren bizkarreko azalpenak hauxe dio: “Hizkuntza txikiek mundua handitzen dute”. Eta badakigu zer garrantzia duen Euskal Herrian. Eta orokorki beste gai anitz jorratzen du: botereen desoreka, mendekotasuna, konfiantza eta nortasunaren eraikuntza. Garbiki erakusten du, batzuetan, gure besterentzearen eragile nagusiak garela, aisetasunagatik eta indar faltagatik. Hain urrun joan gabe, oinarri ona da haurrekin gogoeta filosofikoaren sortzeko. Ttipienekin ere, marrazkiak biziki adierazgarriak baitira. Ilustrazioei begiratuz soilik, gauza anitz aise ulertzen ahal da: txoriaren neurriaren handitzea bere ahotsa atzematen duelarik, munduaren kolorearen aldatzea...
Album aberatsa da, eta baliagarria, denek gure baitako ahotsa atzeman behar dugulako, eta hizkuntza bakoitzak mundu desberdina sortzen duela badakigulako...

Ikus 2018ko martxoko erakusleihoa: Erakusleihoa - Piku azpian
IKASOLAS