-ko eta -tako atzizkiekin, nolako? galderari ematen diogu erantzuna, baina ez dute arrunt balio bera.
Nolakotasun bati erreferentzia egiteko, -ko erabiltzea hobesten da:

✅ Buru argiko neska.
✅ Adineko pertsonak
✅ Ongi egin beharreko lana

Zailtasunak, zenbatzaile bat (bi, hiru, guti, sobera) denean sortzen dira. Ondoko adibidean, haur guziek nolakotasun bera dute (adin bera, hots):

✅ Hiru urteko haurrak (Haur bakoitzak hiru urte ditu.)

Nolakotasun sorta bati erreferentzia egin behar delarik, haatik, -tako atzizkia erabiltzen da. Ondoko adibidean, haurrak hiru multzotan bereizten dira, bakoitza bere nolakotasunarekin:

✅ Hiru urtetako haurrak (Haurrak hiru urtetan zehar sortu dira, adibidez: 2010ean, 2013an eta 2016an)

Horrela, nolakotasun multzo bat inplikatzen delarik, eta ezin delarik nolakotasun bateratua izan, -tako erabiliko da (hau gertatzen da mota, kategoria, neurri gisako hitzekin):

❌ Bi motako liliak
✅ Bi motatako liliak

❌ Genero anitzeko obrak
✅ Genero anitzetako obrak

Beste kasu batzuetan, aldiz, ez bada nolakotasun multzo bat definitzen (adibidez, neurri unitateekin: kilometro, euro, urte...), -tako ezinezkoa izanen da:

❌ Hiru urtetako haurra
✅ Hiru urteko haurra (= Hiru urte dituen haurra.)

❌ Kilo gutitako bildotsak
✅ Kilo gutiko bildotsak

❌ Lau zangotako mahaiak
✅ Lau zangoko mahaiak