Elurra da, eta goazen
leran ibiltzera.
Pentsa zer gozamen:
elkarri bolak jaurtitzera!

Zerua pozarren, haize, euri edo elurra egin arren , Carmen Gil, Erein, 2015

Negu bizia

Etxe aintzineko zuhaitz biluzian,
Eguzki apalaren argi eskasa
Urratzen da mila urrezko pusketan.
Abendo hozpilak amaituz urtea, 
Lo kuma luzetan amestuz nabila
Urte berriak ekarriko duena. 

Urtarril goizetan, pentze alorretan,
Gaueko izarrak aurkitu dezazket
Prestuki etzanak dirdira bizian.
Zilarrezko mundua amets dezaket
Argi-izpiek gesaltzeko artean,
Mundu hotz gordina baztertuz agian. 

Otsail mutua hots apalez mintzo da,
Entzule harkorrak aditzeko gisan,
Gorderik daukan kemen berritzailea
lzakien arduraz agertu nahian.
Bozkarioz ospatu ihauteria, 
Biziari deituz izerdi berria. 

Ortzien burrunba, deiadar ozena,
Udaberriari martxoak diona.
Txorien kantak urratzen du lanbroa
Lehen argi-izpiek hurtaraztean;
Orduan dira, apaindura berrian,
Agertzen loreak distira betean 

Jean-Louis Errotabehere

Firurikan : Bereziki haurrentzat - Lau sasoinak kantuz / Euskal haziak, Agorila, 2009

Azaroko arratsaldean elurra ikusi dut

Azaroko arratsaldean elurra ikusi dut 
Bianditz mendiaren hegal-gailurretan, 
xuri hartan begirada itsatsirik 
«berriz ere negua atarian» 
esan diot ahots apalez nere buruari, 
zer nolako hunkidura elur xuriena 
nerabeak ginenean herri galdu hartan...
begiratzen genituen bortuak, mendilerroak 
eta han ekialdean Nafarroa zegoela esaten ziguten,
Lesaka, Baztan, Auñamendiak 
haratago Europako erresumak edo agian Errusia
ez baikenekien noraino ailegatzen zen mundua,
baina mendilepo hurbil haietatik zetorkigula dena
hori ongi genekien gure ezjakin eskasean,
hodeiak, ekaitzak, elurrak eta negua, 
eta izendatzearekin eraikitzen zirela gertakizunak
eguratsen aldaketak iragarri eta hala behartuz... 
gero laster eguberria genuen atarian
eta Olentzero ikazkina menditik jaisten zenean 
sua eta mezua bailarara ekarriz
gure bihotzetan zilarrezko txintxarriek
errepikatzen zuten zorion harrituaren domua...
penaz begiratzen genien orduan zoritxarrekoei
eta haiengandik hurbilago ginen sentitzen
zorteak onizatearen atari epeletatik uxatu zituelako...
gaur, izan ginen hartatik 
ia ezer ez denean geratzen
berriro xuriz jantziak ikusi ditut mendiak, 
ekialdeko bortuetara begiratu dut hunkitua
eta barnearen barne barneratuenetik esnatu zait
denboraren abaraskaren pean 
estalia zegoen kantua:
goiko mendian elurra dago, errekaldean izotza. 

Xabier Lete

Egunsentiaren esku izoztuak, Xabier Lete, Pamiela, 2008

Erran eta esan 

Erran eta esan 
beti lagun
handien gisan. 

Berba eta hitza
biak elkarrekin
dabiltza. 

Dugu eta degu
bata bestearekin
uda eta negu. 

Zurekilan eta zurekin
ongi konpontzen dira
elkarrekin. 

Gura eta nahia
bat da
bestearen anaia. 

Eman eta emon
elkarrengandik
urrun ezin egon. 

Antton Kazabon

Bazen behin, behin bazen, Antton Kazabon, Elkar, 1995

IKASOLAS