Uxue Alberdi, Eider Eibar, Elkar, 2018
Emozioen kudeatzen ikastea premiatsu da haurren heziketan. Azken urteetan emozioei buruzko haur liburu anitz plazaratu dira. Gehienik emozio “negatiboak” edo zailak aipatzen dituzte: haserrea, beldurra, ahalkea...
Uxue Alberdi eta Eider Eibarren liburu horrek, aldiz, poza aipatzen du – tituluak adierazten duen bezala - eta plazera sortzen, bai testuaren bidez, bai marrazkien bidez.
Zoragarriki ilustratua da. Irudiek aldi berean berotasun eta freskotasun inpresioa ematen dute. Kolore nagusia gorria da; hori eta laranja koloreek ere leku handia daukate, baita berde eta urdin argiek ere. Orrialde guzietan, azalean bezala, borobil gorri bat dugu, eguzki goxoa, erretzen ez duena, baloi jolastia. Ilustrazioek natura gogoratzen dute: hostoen artean murgiltzen gara, edo belarrean. Marmutxak denetan ditugu: pinpirin sortak, katalingorriak, matxinsaltoak, erleak... eta erdian, haur bat behatzen eta gozatzen ari. Natura ederra eta hurbila. Beldurrik ematen ez duen natura da; alderantziz, bihotz altxagarria. Egiazko poza ekartzen du.
Liburuaren forma ezohikoa da: zabal baino bi aldiz gorago da. Bertikaltasuna ekartzen du. Ematen du pozak handiarazten gaituela, zerurantz eramaten gaitu, oroz haraindikoa da.
Uxue Alberdiren testua ere biziki ederra da, osoki bertsotan idatzia.
Bertsoek eta irudiek ederki elkar osatzen dute. Haur baten gogoetak ditugu: udalekura joatekoa da, lagunekin kanpatzera eta plazer guziak aurreikusten ditu, edo oroitzen: ilargi betea, lagunen kantu-hotsa, musuen emateko sekretuzko xokoa, sormen lana... baita espero ez dena ere.

Abiapuntua hau izan daiteke: haurrekin zerrendatzea egiazko poza ematen diguna... aita-amen besarkadak, lagunekin errekan jostatzea, zuhaitzetara igatea edo ttattolen eraikitzea, bixkotx baten egitea eta gero haren eskaintzea... Plazer sinpleak, egiazko bizipoza ekartzen dutenak...

Ikus 2021eko otsaileko Erakusleihoa: Lorerik Gorriena
IKASOLAS