Barruko hotsak eta beste soinu txiki batzuk
Leire Bilbao; Maite Mutuberria, Pamiela, 2021

Jende asko olerkiaren beldur da. Alta, ona delarik, hizkuntzarekin eta emozioekin jolasteko medio ezin hobea da. Preseski, Barruko hotsak eta beste soinu txiki batzuk izenburuko liburuan, jolasteko aukera anitz dira: olerki labur-laburrak, kaligramak, onomatopeiak...
Hamar kapitulutan sailkatuak dira poemak, haur baten egunaren errutina segituz: jaikitzetik oheratzeko memento arte, ikuztea eta otorduak ahantzi gabe. Gaiak ttipien interesetik hurbil dira, egunerokotasunean oinarrituak: gorputza, etxea, inguruko animaliak, jantziak, eskola. Olerkiak lehen pertsonan idatzi ditu Leire Bilbao idazleak. Animaliez eta soinuz betea den irudimen handiko haur baten barneko bizi aberatsa mirailatzen dute. Zinez haur baten barne mundua marrazten dute olerki labur horiek eta mundu horren lekuko bakarra irakurlea da, ez delako beste nehor. Familiakoak ez dira kasik agertzen; ama pare bat baizik ez da aipatua, beti bigarren planoan, eta lagunak ez dira batere presente.
Elkarrizketa batean, Leire Bilbaok erran du: «Nire nahia zen poema bakoitzean irudi bat ikusi eta soinu bat entzutea». Eta horrela da, tipografiarekin jolasten da, letren formak eta haien arteko tarteak aldatzen dira, testuarekin marrazten du. Soinuei dagokionez, badira mota guzietarik: onomatopeiak, animalien oihuak, asonantziak... Ahoz errateko pentsatuak dira, bozarekin jostatzeko... Gainera, liburua ederra da, kalitatezko paper lodiarekin egina. Ferekatzeko eta usaintzeko gogoa ematen du! Gure zentzumen guzien festa!
Maite Mutuberriaren marrazkiek anitz ekartzen dute, barne munduaren itxuratzeko pista irekiak ematen dituzte, irudimenaren pizteko. Formekin eta izariekin jolasten da, formak borobilak eta leunak dira, kolore goxoak.
Ez da Leire Bilbaok eta Maite Mutuberriak elkarrekin egiten duten lehen olerki liburua, “Piztipoemak eta beste xomorro batzuk” eta “Xomorropoemak eta beste piztia batzuk” jadanik argitaratu dituzte, eta liburu biziki gauzatuak dira. Baina hor, poemak intimoagoak dira, batzuk irrigarriak, anitz hunkigarriak, batzuetan aski sakonak. Maite Mutuberriak ilustratu duen Iñigo Astizen Joemak eta polasak liburua bezalakoa da: haurrendako olerkia baina helduek gozatzeko modukoa.

Begiak eta belarriak
ondo ixten badituzu
zure hezurrak hazten
entzun dezakezu.

Begiak eta belarriak
ondo zabaltzen badituzu
zure bihotza dantzan
hauteman dezakezu.

Begiei eta belarriei
buelta ematen badiezu
biriketako kaiola
za bal de zake z u

«Barruko hotsak» liburuaren soinu-banda