Hartu eta bota arnasa
hego haizea
biriketatik pasa.

Saihetsak
zuhaitzak udaberrian bezala puztu
barruan daramazun txoriak
dezan abestu.

Barruko hotsak eta beste soinu txiki batzuk, Leire Bilbao, Pamiela, 2021

Erlojuaren tiki-taka
euria bezala tantaka
segundoak erortzen zaizkit
eta minutuak doaz hegaka.
Bederatziak direla!
Berandu gabiltzala!

Bizkor ibiltzeko, azkar ibiltzeko
mundu guztia tarrapataka!
Zertarako? Zertarako?
Bihar 24 ordu barru
ez al da ordu bera izango?

Maindire* artean barneratzea
gutun zuri batean
sartzea bezala da.
Zast!
Ez dakizu nora
eramango zaituen loaren postariak.

*mihise

Barruko hotsak eta beste soinu txiki batzuk, Leire Bilbao, Pamiela, 2021

BAKARDADEAREN OROGRAFIA
BASOAK UDAZKENEAN
Adarrak lainoa edaten.
Eguzkiaren adurrak kanpora garamatza.
Paisaia esnatu da, hedatuz doa.
Habiak jaiotzear aharrausietan.

BASOAK ELURPEAN
Elur-denbora dator.
Orduen aingeruak keinu egin digu.
Tekla bat bularrean behera:
sustraiek negar.

MENDIAK
Itzalen mehatxupean bidea eginda,
lurralde berria.
Neguak atximur dagie harkaitzei.
Bidaiariaren sorbaldak aireari eusten.

GAILURRAK
Erlaitzen min zehaztugabea
petaloak bezalako hortz hauetan.
Izua erpinean,
bisita-txartela mundu izozturako.

OLATUAK
Olatuaren jakituria:
nortasunik gabe, koderik gabe.
Gure besoen letrak, ur-zuziak
ekaitz eta sosegu artean, argizari-urratsak.

HERRIAK
Pintzelaren ileak urratu ditu
teila, horma, arkupe, kanpandorre.
Azal eta hezur herriak eguerdian.
Oinetan, bidearen marka.

KANPAIAK
Mingain sorminduak goian iltzatuta.
Alde orotara begira.
Alde orotatik begira.
Etorriko ahal da ordu guztiak barkatuko dituen ordua.

NATURA HILAK
Ez ditugu falta ogia eta ardoa, fruituak.
Txoriek xuxurlatzen dutenean:
"Leihotik hara badira elur-panpinak lako haurrak".
Belarrietan hitz zuzena apailatzen da.

Nola gorde errautsa kolkoan / Miren Agur Meabe, Susa, 2020

• Erortzean, unetxo batez hegan egiten da.

• Gauzak lekuz aldatzean, lekuak gauzez aldatzea baino ez da lortzen.

• Burua bere lekuan jartzeko, ez dago zertan gorputzetik kendu.

• Lasterka batean azkena iristen dena da denbora gehien korri egiten duena.

• Liburutegia da buruaren saltogela.

• Pupuan* trapua jartzea baino hobe trapuan jartzea pupua.

*Pupu = mimi (haur hizkera)

Motx-motxean: Aforismoak hasiberrientzat Juan Kruz Igerabide, Denonartean, 2021