Gertakariz gertakariko kontakizunak¹ prezatzen badituzu,
ipuin itzulipurdikatuak² gustatzen bazaizkizu,
album irrigarriak maite badituzu,
testu aberatsak estimatzen badituzu,
haur literaturak liluratzen bazaitu,
Bisitari bitxia izeneko liburua irakurri behar duzu!
Azalean, liburuaren bi protagonistak ikusten ahal dira: emazte zahar bat eta agertuko zaion bisitari bitxiaren itzala. Testua emaztearen eta egoeraren aurkezpenetik hasten da:

Preseski, gau horretan, bisitari bat ukanen du, baina pixkanaka-pixkanaka agertuko da. Kontakizunaren lehen partea misteriozko bisitaria urratsez urrats agertzeko gisan eraikia da testua: atsoaren etxeko atea irekitzen delarik, bi oin agertzen dira. Bost minutu berantago, bi zango ere, gero ipurdia, gerria, tripa, besoak... Munstro gosetia osatu arte.
Paraleloki, testua ere osatzen da, parte bat errepikatzen da:

Aitzinatu arau, elementuak gehitzen dira igurikatze hertsagarria irudikatuz eta giro beldurgarria sortuz: "Hontza uluka, haizeak putz egiten, tximistak dir-dir, trumoiak jo..."
Bisitari osoa agertzen delarik, Txanogorritxuk otsoari bezala, emazte zaharrak munstroari galdetzen dio: “Zergatik dauzkazu oin zapal eta handi horiek? Zergatik dauzkazu hanka argal eta iletsu horiek? Zergatik daukazu ipurdi handi eta potolo hori?...” munstroak erantzun arte: “ZU HARRAPATZEKO ETA JATEKO!” Baina aldi honetan, atsoak Txanogorritxuk baino hobeki kudeatzen du egoera eta ipuina ongi bukatzen da denendako.
Hizkuntzaren aldetik, oso album baliagarria da.
Hiztegi biziki interesgarria du arlo bat baino gehiagotan: gorputzen atalak, adjektibo anitz... Testua kurubilka garatzen da, errepikatzen eta osatzen da, eta haurrek errazki barneratzen ahal dute jakinez ilustrazioek ulermena arras ongi laguntzen dutela. Erranaldiak sinpleak dira eta bertsoz eginak. Oinarrizko perpausaren egituraren lantzeko parada ezin hobea eskaintzen du: "Trumoiak jo zuen, kandela itzali zen..."
Ilustrazioak ere zoragarriak dira, umorez beteak. Kontakizun nagusiaren ondoan, beste istorio batzuk ere iragaten dira: murruan diren obretako pertsonaiak lekuz aldatzen dira, gatuak bere bizia egiten du...
Egileak albumaren izariekin ere jostatu dira. Adibidez, munstroaren neurrien irudikatzeko, liburua zutik ezarri behar da (Plast! albumean bezala).
Lehen mailako ikasle guziekin baliatzen ahal den liburua da. Handienekin adibidez, eredu bera segitzen ahal da beste istorio baten asmatzeko...
Eskola guzietako liburutegietan izan behar den albuma!

Bisitari bitxia / Iglesias, Gracia, Egilea; Cruz, Vicente, Irudigilea; Arana, Aitor, Itzultzailea . - Mezulari, 2019. - 1 libk. ([40 orr.]) 24 cm

¹Albums en randonnée
²Contes détournés

2022ko martxoko Erakusleihoa: Barruko hotsak
IKASOLAS