Egun batez, goiz-goizik, neskatxa bat basoan ibiltzera abiatzen da aitatxirekin. Aitatxi ihiztaria zen gaztetan baina orain, hiltzeko ordez, animaliak argazkitan hartzen ditu. Horrek neskatxaren jakin-mina piztu du eta aitatxiren etxearen murruetan argazkitan ikusten dituen animaliak ezagutu nahi ditu.
Haatik, basora heldu eta fite, elkarretarik urruntzen dira eta bistatik elkar galtzen dute. Neska bakarrik ibiltzen hasten da zuhaitzen artean, aitatxi xerkatuz eta deituz, baina arrangurarik gabe. Konfiantza du aitatxi goiz ala berant agertuko dela. Harritzen da hala ere argazkitan ikusi dituen animaliak ez baititu ikusten. Aitatxi ere ez du hautematen. “Ez aitona, ez basurde, ez untxi ezta kaskabeltzik ere.” Bera da narratzailea eta basoa hutsik dela erraten du. “Ez arrano, ez hontz, ez txantxangorri, ez gailupa, ez karnaba... Aitonaren arrastorik ere ez!”.
Irakurleak, aldiz, beste errealitate bat ikusten du: neska animaliez inguraturik ibiltzen da, ohartu gabe, eta aitatxi beti inguruan du, zaintzen.
Horretan da albumaren xarma: kontraste handia bada neskak kontatzen duenaren eta irakurleak ikusten duenaren artean. Bi kontakizun horiek albumaren narrazioa josten dute.
Irudiak animaliez beteak dira eta irakurle gazteek gozatuko dute animaliak bederazka atzemanez eta ilustrazioen xehetasun guziak aztertuz. Helduaren laguntzarekin, aukera izanen dute animalien izenen ikasteko ere. Heldu batzuek ere hiztegia landu beharko dute beharbada: karnaba= chardonnet, gailupa = bouvreuil pivoine...
Basoan barna Ainara Azpiazuren obra da, bai testua bai irudiak. Ainara Azpiazu marrazkilaria da eta beharbada gehiago ezaguna da irudigile gisa idazle gisa baino, nahiz eta beste album arrakastatsu baten egilea izan: Arraroa. Irudiek garrantzi handia dute bi albumetako kontakizunean.
Ainara Azpiazuren marrazteko estiloa aldi berean naifa da - forma biribilekin, kolore garbiekin... - baina zehatza: xehetasunak ongi emanak dira eta txori motak ongi bereizten dira, haien ezaugarriak identifikatuz.
Umorez betea da albuma: ikusi behar da adibidez azeri familia paratzen argazkilariaren aitzinean, zinemako izarrak bezala...
Adin desberdinetako haurrei egokia zaie liburua, ttipiei zein handiei, maila bat baino gehiagotan irakurtzen eta lantzen ahal delako.

Basoan Barna / Ainara Azpiazu / Elkar (2021)

2022ko azaroko Erakusleihoa Tik, bakarrik, tak, ikarak