Mintzatzen irakasteko eta haurren hezteko, tresna baliosak dira kantuñoak. Helduen eta haur ttipien arteko oinarrizko harreman tresnak dira. Ninia laguntzen dute eguneroko bizian, mina edo beldurra uxatzen, jateko edo lo egiteko mementoan, halaber nork bere gorputza ezagutzen, konfiantza hartzen, eta bereziki burasoarekin edo hezitzailearekin jolasteko eta komunikatzeko. Hizkuntza eta kultura guzietan badira horrelako formulak, seaska kantuak, erhi jokoak... euskaraz ere. Familian transmititzen dira gehienetan eta transmisiorik ez bada, galtzen dira... Pierre Duny-Pétrék ondare hori bildu zuen Xirula Mirula liburuan eta zinez eskertzekoa da. Baina ez dira kantuño guziak gaurko egoerari egokiak eta burasoek ez dituzte errazki baliatuko.
Din Dilin Dan liburua, aldiz, transmisio horren laguntzeko tresna ezin hobea da. Pello Añorgak ahozko tradizioko kantuñoak bildu ditu eta sorkuntzak gehitu. Kantu edo bertso labur-laburrak dira eta kasu guzietan ohar batekin heldu dira, nola balia daitekeen adierazteko eta zer adinari egokia zaion zehazteko. Gainera, QR kode baten bidez, kantuño bakoitzari doakion bideoa ikusten ahal da.
Haurtzaindegi eta haur eskola guzietako apaletan kausitu behar liteke liburu hori...
Horra bi adibide (119 kantuñoren artean!):

Din dilin dan / Añorga, Pello, Egilea; Rosende, Maite, Irudigilea . - Berriozar : Denonartean, 2022. - 242 or. : kol. ir. ; 16 cm + Bideoak linean.

2023ko martxoko Erakusleihoa Basoan Barna