Ilargiarena
Ilargi amandrea zeruko atean,
oihuka mintzatzen da
betea denean.

Ilargi amandrea zeruko atean,
txortxorka mintzatzen da
ilgora denean.

Ilargi amandrea zeruko atean,
murmurka mintzatzen da
ilbehera denean.

Ilargi amandrea zeruko atean,
isil-mutu mintzatzen da
ilberri denean.

Miren Agur Meabe 75. Irria aldizkarian 2018ko maiatza

Suari beha
hegan doakit gogoa
erre gaberik.

Gerezi garaiko haikuak, Josu Jimenez Maia, Maiatz, 2011

Lurmen hasiak
itxaropen haziak
beti alderrai.

Gerezi garaiko haikuak, Josu Jimenez Maia, Maiatz, 2011

Izotz ziri bat
hegitik zintzilika
sosegua da.

Gerezi garaiko haikuak, Josu Jimenez Maia, Maiatz, 2011

Haizea dabil
bidegurutzean da
iparra galdu.

Gerezi garaiko haikuak, Josu Jimenez Maia, Maiatz, 2011

Ardi xuriak

Ardi xuri bat
ardi xuri bi
hiru ardi xuri
ardi xuri lau
ehun ardi xuri
artaldean xuri
artalde xuriak
artzain buru xuria
ehun ardi xuri
xuri-xuri

Orri xuri bat
orri xuri bi
hiru orri xuri
horri xuri lau
ehun orri xuri
liburuan xuri
liburu xuriak
ipuin xuria
liburu xuriak
ehun orri xuri
xuri-xuri

Antton Kazabon, Hitz xuriak , Desclée de Brouwer, 2008

gaueko hotza
azaletik sartzen zait
euri zorrotza

Tantaka, Peru Magdalena, Bale zuria, 2021

Maite ditut
maite
gure bazterrak
lanbroak
izkutatzen dizkidanean
zer izkutatzen duen
ez didanean ikusten
uzten
orduan hasten bainaiz
izkutukoa...
nere baitan pizten diren
bazter miresgarriak
ikusten.

Joxan Artze, Enborretik antologia poetikoa, Balea zuria, 2023