Euskal Herriko 40 emakume : Egon ginen, izan ginen liburuak alde interesgarri bat baino gehiago ditu.
Gaia, hasteko: Euskal Herriaren historian emazteek merezi duten lekuaren berreskuratzeko erakarpena da. Alabaina, 31 emazte nabarmen aurkezten ditu aniztasuna erakutsiz: kirolariak, artistak, politikariak, enpresariak... Liburuak emazte ezezagunak ere omentzen ditu zortzi lan arloren bidez: baserritarrak, neskameak, saregileak... Emazte horiei guziei esker, Euskal Herriaren historiaren parte bat irudikatzen ahal dugu, eta emazteen eragina zer izan den hobeki ulertzen dugu. Adinari dagokionez, gai horrek irakurlego zabala biltzen ahal du, egokia da bai 8 urtetik goitiko haurrentzat, bai nerabeentzat, bai helduentzat.
Edukiaren forma berezia da. Orotara 40 emazte edo emazte talde agerian ematen dira: bakoitzaren kasuan orrialde bateko testua alde batean eta bestean ilustrazioa. Lehen begi kolpez eta irakurri gabe, pentsa daiteke bertsotan idatzia dela testua, lerro labur anitzekin. Baina ez da hala, irakurtzeko zailtasunak dituztenentzat pentsatua da. Liburuaren hastapenean, zehaztua da "IFLAk (International Federation of Library Associations and Institutions) zehazturiko arauak betetzen dituela eta irakurketa arazoak dituzten pertsonentzat material egokia dela." Irakurketa erraza labela emana da gibeleko azalean. Dislexikokoak diren haurrentzat irakurketa egokia da¹ baina biziki baliagarria izan daiteke euskara maila apala dutenentzat ere. Izan ere, "irakurketa erraza" arloan sartzeko, hainbat arau bete behar dira, besteak beste:
 Lerro bakoitzean ideia bakar bat.
 Erranaldi laburrak.
 Mezu inpliziturik ez.
 Aipatuak diren ’nork’, ’nor’ eta ’nori’ izendatuak dira biziki erregularki.
 ...
Arau horiek estilo berezia sortzen dute, literarioa ez dena baina oso ulergarria eta baliagarria.
Adibide bat, Loli Lopez mendigoizalearen kasuan:

Loli Lopez donostiarra 1930ean jaio zen.
Urte txarra emakumea jaiotzeko,
batez ere naturazalea bazinen.
Hau da, Loli Lopez naturazalea zen garai okerrenetan.
Hala ere, Lolik ez zuen atzera egin,
eta mendira hurbildu zen.
(...)

Elena Ciordioak ilustrazioak sortu ditu. Hor ere, ulermenaren errazteko egina da. Testua ezkerraldean kokatuak da beti, eta parean eskuinaldeko orria osoki betetzen duen marrazkia dugu. Aldi bakoitzean, aipatua den emaztea bere ingurumenean erakutsia da, eta horrek ere irakurketa anitz laguntzen du.
Laburbiltzeko, liburu biziki interesgarria eta ongi egina da euskaraz irakurtzeko oztopoak dituztenentzat.

¹Arau horien hobeki ezagutzeko: euskaraz eta Frantsesez

Euskal Herriko 40 emakume: Egon ginen, izan ginen / Crespo, Cira, Egilea; Ciordia, Elena, Irudigilea . - Bilbo : Ediciones Beta III Milenio, 2023. - 86 or. : kol. il. ; 25 cm. - (Irakurketa erraza)

2023ko ekaineko Erakusleihoa: Din Dilin Dan