Erakusleihoa - Ilargian kulunkantari bilduma

Euskaraz sortu obra guti dugu nini edo haur ttipiendako. Alta, funtsezkoa da liburuen bidez hizkuntzaren transmititzea ahal bezain goiz.
Beharrik, beti kalitatezko liburuak eskaintzen dituzten Pamiela eta Kalandraka argitaletxeek bilduma bat sortu zuten duela hamar bat urte, 6 hilabetetik goitiko haurrentzat. Orain 14 titulu eskaintzen dituzte, denak egile berek sorturik.
Antonio Rubiok eta Xabier Olasok liburuen testuak idatzi dituzte. Testu biziki soilak dira, kantuñoak kasik, errepikekin, errimekin... kantatzeko pentsatuak dira. Izan ere, Pamiela argitaletxearen webgunean, album bakoitzari doakion kantua ematen dute haurrek grabaturik. Ikus-poema errezitagarria gisa kalifikatzen ditu argitaletxeak, hausnarketarako eta sorkuntzarako prozesu luze baten emaitza.

Oscar Villanen ilustrazioek leku nagusia dute eta hitzei hertsiki lotuak dira. Liburu guziak berdin egituratuak dira: hitz bati (gutitan sintagma labur bat) marrazki bat dagokio. Horrela, haurrak liburua ‘irakurtzen’ ahal du helduarekin batera. Estetikoki, marrazkiak biziki kausituak dira, ulerterrazak eta xarma handikoak, kolore biziz eginak. Neurri ttipiko liburuak dira (16 x 16 cm), kartoizkoak, haurrek eskuetan hartzeko gisan.

Gaiak oinarrizkoak dira eta gauza anitzen ikasteko balio baldin badute ere (koloreak, animalien izenak, bosteraino kontatzeko...) ez dira liburu pedagogikoak, jolasteko eta gozatzeko album ederrak baizik.