kantu ederra
txori ikusezina
baso erdian
Peru Magdalena, Tantaka, Bale zuria, 2021

Maitatuak garelako, izan, bagara gu,
maite dugulako, bizi, gara gu bizi.
Joxean Artze, Enborretik antologia poetikoa, Balea zuria

Aho-korapiloak

Leo lehoia leihoan:
 Alaia lehoia, adio!
 Adio, lehoiko Leo lehoi!

Ziri zuri sartu zuri,
zuri sartu ziri zuri,
zuri ziri,
zuri zauri.

Beleko baleak bala balu...
Beleko bala baleak balu...
Beleko bele-baleek bala
balute...
Xabier Olaso, Hanka, moko eta buztan: Animaliekin dantzan, Ikaselkar

Erbia eta trikua

Erbiak eta trikuak
egin zuten apustu
gezurrik handiena
zeinek plazaratu:

 Basoan ari dira
arbolak ibiltzen...

 Inurriak metroka
handitzen, handitzen...

 Baleak eta zebrak
fla-fla hegaldatzen...
 Ardiak eta otsoak
elkar besarkatzen...

 A, zelako gezurrak!
Kilo eta erdikoak!
Zure arantzak ere
berdin antzekoak!

 Zure gezurrak, lagun,
luzera handikoak;
halatsu belarriak,
metro batekoak.
Xabier Olaso, Hanka, moko eta buztan: Animaliekin dantzan, Ikaselkar

Argi gordea

Hedoi beltz batek
Gorde daut iguzkia
Geroztik hemen nabil
Ilunpean (e)ta hoztia
Bainan ez dut ahantziko
Sekula zure aurpegia
Bihotzean sartua zait
Betikotz zure argia
Henriette Aire, Egiaren egarriz

Paperez
Paperez egin dut itsasontzi bat
Putzuan eman eta urperatu da

Paperez egin dut igel ttipi bat
Belar gainean utzi, ihes egin du

Paperez egin dut hegazkin bat
Zerura bota, hegal egin du

Papera hartu dut
Bihotz handi bat
Gorriz margotu, zuretzat opari
Arantxa Hirigoyen, Ttinka

Izarrek, hil ostean, dir-dir jarraitzen
dute gure begietan.
Uxue Alberdi, Hili, Elkar