Segurtasun handiz pentsa daiteke 8 urteko haur gehien-gehienek ez dakitela egiazko gutunak zer diren, gutunontzietan publizitateak eta fakturak baizik ez ditugulako jasotzen orain eta beste modu batez komunikatzen dugulako ingurukoekin.
Yolanda Arrieta oinarri horretatik abiatu da gutun-eleberri baten idazteko.
Asa izeneko protagonistak 8 urte ditu, migrante familia bateko haur nagusia da eta lau haurride ditu. Eskolan, irakasleak ikasleei gutunen idaztea galdetzen die, lehenik azalduz zer den. Asak berriki zendu zitzaion birramamari idaztea erabaki du. Bederatzi eskutitzen bidez, irakurleak ezagutuko du Asak bizi eta gogoetatzen duena.
Yolanda Arrietak haur baten ikuspuntutik hainbat gai aipatzen ditu: ikasteko prozesua, eta eskolako giroa, euskararekiko harremana, integrazioa, heriotza eta dolua, adiskidetasuna... Izan ere, Asaren irakasleak (Jonek) ikasleak euskaraz trebatzeko helburua izateaz gain, barnekotasuna eta emozioen adierazpena ere landu nahi ditu.”Etxean inork ez du maitea esaten, eta gelan ere ez. Baina Jonek esaten du hitzekin entrenatzen ez badugu, hitzak desagertu egiten direla. Horregatik asmatu zuen gutunen jolasa, sentitzen duguna hitzekin kontatzeko.”
Ilustratua baino gehiago, apaindua da liburua. Gutunak (orrialde bikoitzetan kokatuak) kolore eta marrazkiz osatuak dira. Bizitasuna ematen dio testuari gutunei protagonismoa kendu gabe.
Liburua 7 urtez goitiko haurrei egoki zaie; errazki irakurtzen ahal dute bakarrik.
Ikuspegi pedagogiko batetik, liburuko irakasleak egiten duen bezala, liburu hori ikasleek gutunen idazteko proiektu baten abiapuntu ezin hobea izan daiteke. Euskaraz trebatzeaz gain, barnekotasuna eta emozioen adierazpena ere lant daitezke!

Gutunak birramamari / Yolanda Arrieta, Egilea; Concetta Probanza, Irudigilea. Denonartean, 2024. - 29 or.

Liburuen aurkezpen guzien ikusteko: Erakusleihoa