Poesia nahas-mahas... Pozak badaki hegan
Pozak badaki hegan,
guk baino gorago!
Hanka ugari ditu...
Edo bat gehiago!
Ezkutatuko balitz,
Xomorro, pikaro...
Zuk ikusi ez arren
Beti hortxe dago.
Uxue Alberdi, Poza
Lorratzak
Ikusten ote duzu goizean
Egunsentia esnatzen
Eguzkiaren lehen izpiek
Ortzi hondoa gorritzen
Udazkeneko aire eztiak
Lur azala ferekatzen
Ihintza tanttak belar hostotan
Sor argian dirdiratzen
Izadiaren edertasuna
Begi aurrean agertzen.
Txomin Heguy, Lorratzak
URA
Ongi murgilduz gero
ikus daiteke
itsaso bat
ur tanta batean
eta
itsaso batean
ur tanta bat
ikus daiteke
ongi murgilduz gero.
Iñigo Astiz, Joemak eta polasak
Entzun, entzun
ibai-hotsa.
Hara,
hau hotza!
Entzun, entzun
haren xuxurla.
Hara,
badatorkigula!
Entzun, entzun
jango gaituela!
Hara,
hau hozka epela!
Juan Kruz Igerabide – Nire gorputzean bizi naiz
Carpe diem, baina bihar.
Idoia Torregarai Martija – Mikro ipuinak
Konfort-gunetik ateratzeko esan zioten, baina ez zioten bueltatzen utzi.
Idoia Torregarai Martija – Mikro ipuinak
Uda berriak
Udan gozoro
eguzki izpiak kristal joka.
Betozkit oporrak saltoka.
Hondar ale zenbait
gelditu zaizkit maindireetan,
Gera bitez,
negura arte.
Hostoen erorketa librean,
haizea nagusi,
Larrazkenak eihartu du lurra,
xistuka, erratzaren esperantza.
Ihintz xuritua, hotzaren salatari.
Gure aita so leihoari,
Egun ederrari kantari
xoriño bat noiz agertuko.
Negu gorrian
katagorria
zuhaitz biluzian goiti,
Askatasuna iradoki zion bati.
Eta nik ere nahi nuke
izan katagorria bezala.
Keinuka mendi mazela
bere haritz eta zulo.
Nola egon zaitezke lo,
udaberria datorrela?
Pentzeak asfaltoz eta
hilerriak loretan,
udan baino gutxiago sinesten al duzu
uda berrietan?
Maddi Sarasua Laskarai – Biharraren hegietan - Maiatz