Bernardo Atxagaren ‘Behi euskaldun baten memoriak’ euskal literaturako haur eta gazte saileko obra ezagunenetarik da. 1991n plazaratu zen lehendabizi eta zenbait aldiz berrargitaratu da. Frantsesera itzuli zen 1994an, baita beste hizkuntza anitzetara.
Behi filosofo bat da protagonista eta narratzailea: Mo. Behi berezia da: bizitzaz gogoeta anitz egiten ditu, ezberdina izan nahi du eta bere askatasuna bilatzen du…
Gerla zibilaren ondotik mugatik hurbil den etxalde batean sortua da. Gerla ofizialki bukatua da baina galtzaileen kontrako errepresioak segitzen du, eta etxaldea gatazken erdian kokatua da...
Liburuak osagarri bat baino gehiagori esker bildu du arrakasta: umorea, alde filosofikoa, alde politikoa eta historikoa, kutsu poetikoa.
Eleberri grafiko gisa atera da iragan ekainean. Oinarrizko obraren osagarrien atxikitzea lortu dute egileek beren obra propioa sortuz. Atxagaren hitzetan “Ez da kontaera berbera, bertsio bat baizik. Eta ’bertsioa’ esaten dut, musikaren zentzuan. Bertsio bakoitzak ematen dio beste inguru bat.”¹
Pello Varelak gidoia egin du eta irudiei narrazioaren parte handi bat utzi die. Ondorioz, testuaren aldetik, orrialdeak ez dira sobera kargatuak. Bunbuiloek hizlarien araberako koloreak dituzte, eta gisa horretan irakurtzen laguntzen dute. Varelak dio Atxagaren testuaren poesia baztertu behar izan duela, baina kutsu poetikoa hor da oraino, bereziki irudiei esker. Juan Suarez marrazkilaria kolonbiarra da. Estilo adierazgarria du eta kolore paleta oso ederra. Irakurleari sentiarazten dizkio emozioak, ametsak eta ekintzen indarra.

Eleberri grafiko horiek bide berriak irekitzen dizkio Atxagaren obra klasikoari; aukerak eskaintzen ditu gehiagok – eta bereziki gazteek - ezagut dezaten.

Mo : Behi euskaldun baten memoriak / Suarez, Juan, Irudigilea; Varela, Pello, Gidoigilea; Atxaga, Bernardo Egilea; Garikano, Asun, Itzultzailea . - Iruñea : Pamiela, 2024. - 194 or.

¹ https://www.berria.eus/kultura/behi-euskaldun-baten-binetak_2126147_102.html
Liburuen aurkezpen guzien ikusteko: Erakusleihoa