Haizeak eramandakoa
Haize zurrunbilo batek
eraman zuen gizon gizena,
adar iharrak,
zerrien zorriak,
aker okerrak.

Gizon gizena, adar iharrak,
zerrien zorriak, aker okerrak,
denak eraman zituen haizeak.

Haize zurrunbilo batek
eraman zuen irin arina,
txekor txikerrak,
ardi hordiak,
katuen kateak.

Irin arina, txekor txikerrak,
ardi hordiak, katuen kateak,
denak eraman zituen haizeak.

Haize zurrunbilo batek
eraman zuen atsoaren otsoa,
aztiaren astoa,
tximiniako tximinoak,
herriko harriak.

Atsoaren otsoa, aztiaren astoa,
tximiniako tximinoak, herriko harriak,
denak eraman zituen haizeak.
Xabier Olaso, Tximeletak

Negua
Haizea Euri
Ihintza Izotz,
Euria Elur,
beroa hotz,
Gaua luze,
Eguna motz,
sukaldea goxo,
Egutera laiotz.

Txantxangorria sukaldera saltoka,
Negua ate joka.
Antton Kazabon, Matte-Matte

Orbelarena
Udazkenero bezala, hostoak
elkarren gainean,
euriak minik har ez dezan
lur bigunean.
Ekaitza
Ilargia igitai bihurturik,
hosto eta lore ebakitzen ari da,
haize burrunba artean mozorroturik.
Juan Kruz Igerabide, Begi-niniaren poemak

Dohainik
Egun huntako argia sotil-sotilena
Goizeko lehen iduzki izpia
Mendiko more-urdiñaren magia
Gurutzatu dudan aurpegiaren grazia
Egun huntako eskua berri-berria
Haize firfiraren kantu garbia
Etxe-xoriaren melodia eztia
Entzun dudan ele on pizgarria
Egun huntako eskua bero-beroa
Bortzekoa emateko amultsuki tinkatua
Urrundik agurtzeko alaiki altxatua
Zorionez eskaintzeko luzatzekoa

Egun huntako ogia gozoena
Laborariak guretzat ereina
Ongi errea, mamitsua, hazgarria
Elgarrekin partekatzeko samurrena

Egun huntako laguntasuna pozgarria
Bihotzaren mintzaira ordainezina
Bakearen sustrai eta zubia
Esker onez bizitzeko oparia
Graxi Solorzano, HATSAren poesia olerki bilduma 2024

Eskusoinua
s
ez
Uxue
senaz
eskuz
esanez
eskuinetik
ezkerrerantz
biosentsoreak
giza suntsidura
eskusoinuari soaz
eskusoinujoleari
soinuari ez ezik
eskuz soinuari
soin osoko
eskuzabal
izar-haize
zabalduz
isil isilik
itzalek
atzera
sutsu
zerk?
zuk
su
s
Arantzazu Martinez Etxarri, HATSAren poesia olerki bilduma 2024