Arrats Aldeko kronikak Arrats Alde herriskan elkartzen diren hiru istorioren kontakizuna da. Leku txikia da, jaberik gabea (lurra txarra baita), eta horrexegatik lagun talde batek han bizitzea erabaki zuen. Juan de Luna haurrak kontatzen digu behin batean gerra datorrela jakinarazten dela eta gerra hori nola sartzen den herrian pixkanaka-pixkanaka. Biztanleak, arrazoi desberdinak direla medio, elkarrengandik banandu egiten dira: soldaduak, hildakoak, urrundutako senar-emaztegaiak... Gazteek alde egiten dute, gero zaharrek ere bai eta herriska biztanlerik gabe geratzen da, hilda, bakardadeak janda.
Juan Fariasek handi eta txikitxoentzat idazten du; bere irudimenean edozein motako geografia duen munduak du lekua. Kronika hauetan, haurrak gerra nola ikusten duen adieraziz, gazteak bakea pentsatzera eta desiratzera gonbidatzen ditu, gerrak suntsitu, banandu eta hil egiten baitu.