Liburu honetako bost narrazioetatik hiru Ernest Hemingwayren Men Without Women liburutik hartuak dira. Irakurleak hemen aurkituko du Hiltzaileak narrazio ospetsua, Iparramerikako nobela beltzaren iturria omen dena zenbaiten iritziz, Ava Gardner eta Burt Lancaster izar nagusi zituela film zoragarri bihurtu zena. Hori balitzateke aski meritu omenaldi gisako liburu honetara biltzeko. Horrez gain, Francis Macomberren bizitza labur zoriontsua ere hona bildu dugu, zalantzarik gabe Hemingwayren narrazio laburretan ederrenetakoa baita.
Bai bi narrazio horietan, bai gainerakoetan beti aurkituko ditugu muga-mugako egoeretan dauden pertsonaiak, bizitzaren gogortasunari ahal duten bezala aurre egin behar diotenak. Eta liburu osoan zehar Hemingwayren estilo soil, bortitz, gupidagabea.