Musika eguna ; ingurugiroaren eguna ; amaren eguna ; emakume langilearen eguna ; zuhaitz eguna ; aberri eguna ; mahai inguruak ; ihardunaldiak ; topaketak ; hauteskundeak ; osasun publikoa ; esaitez droga ; egizu irri ; projimua maita ; preserbatiboak ez ahantz ; kondena ezazu hori ; lauda ezazu hura...
Zertako luza ? Ez da hau inposatzen den zerbait. Ez. Hau da gizon normalak behar duen airea ; bertzenaz itotzen da ; hasten da amuarrainak belar gainean bezala : bizpahiru zapletako, antsiazko bafada batzu, puztana dar dar, ahoa zabalik, akabo.
Normalduaren bizi modu perfektuak behar du azpiko soinu bat, etengabea. Irria iratxekia eta gehitua duten telebistako pelikula horiek bezala. Gizon normala boterean dago eta manatzen du ezen egin behar, pentsatu behar, jan behar, noiz zertaz kontent edo errabiatu egon behar eta behar guziak nola bete dituen jakiteko, dena, dena zehazki eta klarki erran eta ordena dakiola.