Kantu berritzaile eta politika gizona Hogei urte beteko ditu 2000. urtean Mixel Labéguerie zendu zela. Lan hau, Elkarlanean argitaletxeak eta Euskal Kultur erakundeak galdaturik egina izan da, bertzeak bertze, nolako kantu berritzailea eta euskaldun politikaria izan den agertzeko. 1920an sortua, euskal ingurumen bero batean haunditu zen Mixel. Bi gerlen artean, bai eta 1940tik goiti ere Uztaritze iparralde hontako euskaltasunaren ohantze izan da. Herri hortan zuen, 1934an, Piarres Lafittek Aintzina sortu bai eta Eskualerrizaleen xedeak publikatu. Hamar urte beranduago, 1943an, hor zen zutik eman E.G.B. (Euskaldun Gazteen Batasuna) bere helburu abertzaleekin. Ondorioz erran daiteke, bere haur eta gazte denboran, euskal kantari, dantzari eta bertsolari munduan murgildurik bizi izan dela Mixel. Kantu berria kreatu aitzin, zaharra aras beretua zuen. Enbataren sortzea ere, uste dut, zenbait urte hartako lanaren segida bat bezala ikus daitekeela. Xalbadorrek Herria eta hizkuntza bertsoetan abertzalearen bi ezaugarriak azaltzen ditu : hau euskaraz mintzo da eta Herriaren beregaintasuna eskatzen du... Bertzalde, Mixel Labégueriek erraiten zuen, euskaldun laborariak zirela egiazko abertzaleak, haiek baitute, arrotzeri ez salduz, euskal lurra begiratu. Abertzale mundu hortan erakutsi duen ezkurtasuna leporatzen diotenek badute hor bi gogoeten egitekoa !