ZERBERRI sail honek zinemari eskaintzen dion arreta bereziaren bigarren fruitua duzue honako hau. NOSFERATU aldizkariak antolatzen dituen izen bereko zinemaldiaren hariko lehenbizikoa.
Zinema japoniarraren panoramika zabala eskaintzen digu Felipe Riusek, hiru samurai ezagunenak -Ozu, Mizoguchi, Kurosawa- ardatz harturik, bai, baina haien itzal luzeak ilunduriko beste zinemagile handi eta interesgarri askoren berri emanez bidenabar.
Zinema japoniarrari buruzko xehetasun jakingarri eta bitxi asko eta asko eskaintzen badizkigu ere, ez da horretara mugatzen Felipe Riusen lan hau. Zinemaren historiaz interesatuentzat ezinbesteko, eta zinema zaleak gustura irakurtzeko moduko liburua, zinez.