"Letraduk badaki, probatuk hobeki". Leitzako Palurdo baten esaera honekintxe bukatzen da liburua. Aproposa Patzikuren idazteko modua azaltzeko. Letratutik eta probatutik nahastuz biribiltzen baititu artikulurik gehienak. Bere hizkera bizi eta zorrotzaren indarraz baliatuz, eguneroko edozein gertakari edo huxkeri, poesiaren urribelar goxora edo pentsamendu xuhur politera ekartzeko ere, trebetasun nabaria du. Horretan, Patzikuren estiloak, nekez utziko zaitu ukitu gabe. Edo bihotzean xixta ! edo gogoan kaxka ! baina, nonbaitean eman gabe, nekez.
Liburu honek estilo ugari horren alderdi guziak goxatzeko aukera ematen dizu, euskal kulturaz eta pentsamenduaz ustekabeko kontu polit asko ikasiz bidenabar.