Liburu hau ez da "garai bateko teologo edo pentsalari handiren baten gogorapen hunkigarri soila". Manex Erdozaintzi-Etxarten lanak "izugarrizko gaurkotasuna du oraingo Euskal Herriarendako".
Ipar Euskal Herria, Hegoaldekoentzat sarritan ezezaguna, aurkezten digu Manexek : "...erabiltzen dituen erreferentziak, jasoten dituen influentziak, hartzen dituen iturriak... desberdinak baitira osoki Hegoaldeko egileek erabiltzen dituztenen aldean".
Manexen obra aztertuz, "mende honetako deskolonizazioaren inguruko pentsamenduak abertzaletasunean izan dezakeen pisuaz jabetzen gara ? Mounier-en pertsonalismoak gizartea osatzeko erreferentzia gisa duen sendotasuna ikusten dugu eta Vatikanoko II. Kontzilioaren ondoren Euskal Herrian saiatu diren teologia-bide berriak ezagutzeko bidea eskaintzen zaigu".
..."Iparraldea ezagutzea Iholdi edo Santa Grazi non dauden jakitea baino gehiago da" ... Iparraldekoek "historian zehar jaso duten pentsamenduaren gakoak, beren historia eta gizarte-arazoa, bertan eman den erlijiositate eta sekularizazioa... horiek bezalako erreferentzia handiak ezagutu behar dira Iparraldea zer den ulertzeko. Zentzu honetan Manexen lanak zubi sendo baten funtzioa bete dezake Iparraldea eta Hegoaldea bereizten dituen eta Herri honi hainbeste kalte egiten dion muga politikoa eta psikologikoa gainditzen laguntzeko.