Progrody hirixkan behinola koral merkatari bat bizi zen, Nissen Piczenik, bere prestutasuna eta bere salgai on eta fidagarriak zirela medio inguru guztian ezaguna. Naturaren gurari bitxi eta zeharo berariazko baten kariaz, Nissen Piczenik judu ilegorria zen, eta bere kokospeko kobre kolorekoak alga gorrizta moduko bat gogorararten zuen, gizon osoari itsas jainko baten antz harrigarria ematen ziona. Uste izan liteke Piczenik merkataria nola-halako gizon xelebre gisa zela ezaguna. Ez zen inolaz ere horrela. Progrody hirixkan apal eta nabarmendu gabe bizi zen Piczenik, eta koralei zein Leviatanari buruzko kontaketak bene-benetan hartzen zizkioten.
Leviatana (« Der Leviathan ») kontakizuna 1940an argitaratu zen Amsterdamen, Joseph Roth hil ondoren. Aurretik, frantsesezko itzulpenez agertu zen La Lumière egunkarian 1936an, «Koral merkataria» izenburupean.