Anemometro honek barne haizeen abiadura neurtzen du. Barne haizeena bakarrik. Horregatik ez da anemometro arrunta. Barne haize batzuk ilunak eta gogorrak dira, beste batzuk urdin argiak. Batzuek polena dakarte, beste batzuek geziak edo gatza edo hilekoa. Barne haizea... barne uraren golde. Barne haizea... bela-ontziak portura laguntzen dituena, belarra orrazten duena, esanahia bera ere difuminatzen duena zenbaitetan.
Igor Estankonaren lehen liburuak Zantzoa literatur aldizkarian izan du iturri zati bat. Handik abiatu zen bere ahotsaren erreka poemario hau bustitzera. Eta berba xumeenen arnasaz baliatu da esanahien airean nabigatzeko.
Idazleak berak liburuaren hasieran erakutsi digu ibili nahi izan duen bidea : «Harearen azpian egon behar du hitzen batek beldurrik ez diona sinpletasunari, beldurrik ez diona beso bat galtzeari, irakiteari».