Jon Mirande Aiphasorho 1925.an Parisen jaio zen eta 1972.an Parisen hil. Euskal Herria aitamen etxean eduki du, ezen ia bizi guzian haiekin bizitu baitzen. Euskal Herria etxean zuen eta gogoan ere. Bere obra osoak badu uste dugun baino batasun gehiago nahiz haren obraren mendian, leizeak, harpeak eta harkaitzak badiren. Zerbait berri ekarri digu politika iritzi bortitz batzuen gainetik begiratzen badiogu. Idazlea ez dezakegu ez goregi ez apalegi jar, euskaldun kultura gabeen manikeu ikusmoldean gerta ohi denez. Bere ezaugarri nagusia da bera modernitatean sartu zela eta berarekin euskal literatura eraman. Oraingotasuna ez du galdu berak egin galderei euskal eta europar gizarteak ezpaidu osoki erantzun, batzutan bizkar emanaz, gainbeherako amildegiari buruz.