Literatura sail honi hasiera emateko bidaien inguruko lau narrazio berezi bildu genituen Lau bidaia tituluko liburuan eta orain, hamar urte geroago, antzeko zerbait egin nahi izan dugu Lehen amodioa gaitzat harturik, eta horretarako bost idazle handiren bost harribitxi aukeratu ditugu sekula ahazten ez omen den amodio horren ingurukoak.
Lehenengoa Dylan Thomas idazle galestarraren eskutik datorkigu eta bere gaztaroko oroitzapenetan oinarrituriko Artistakume baten erretratua liburu zoragarritik aukeratu dugu.
Bigarrenak ere badu kutsu autobiografikorik; izan ere, Cesare Pavesek bere gaztaroko maitasunaren inguruko estreinako esperientzien berri ematen digu, bere ohiko estilo paregabean.
Siyvie nobela labur erabat erromantikoa dugu, hitzaren berezko zentzuan, Gerard de Nervalen lan garrantzitsuenetariko bat, eragin handia izan zuena Marcel Proustengan eta bere Denbora galduaren bila erraldoiaren "madalenaren" pasarte ospetsuaren sorreran.
Guy de Maupassanten Txango batean oinarritu zen Jean Renoir zine-zuzendari frantsesa, berriz, bere filme ederrenetariko bat egiteko, Une partie de campagne, hain zuzen ere.
Eta Samuel Becketten ixtorio bortitza duzu, irakurle, bildumatxo honen azken narrazioa, lehen amodioaren inguruko gorabeherei erremate on bat emateko.